کارگەی شانۆ لە ڕاگەیاندراوێکی تونددا سەرکۆنەی بڕیارێکی نوێی بەڕێوەبەرایەتیی گشتیی پۆلیسی هەرێمی کوردستان دەکات، کە تایبەتە بە سانسۆرکردنی ئەو فیلم، دراما و شانۆگەرییانەی کارەکتەری "پۆلیس"یان تێدایە. هاوكات ڕەخنەی توند ئاڕاستەی وەزارەتی ڕۆشنبیری دەکرێت بەهۆی بێدەنگبوونی لە ئاست ئەم بڕیارە.
کارگەی شانۆ لە ڕاگەیەندراوەکەیدا ئەم هەنگاوەی بەڕێوەبەرایەتیی پۆلیسی بە پاشەکشەیەکی مەترسیداری ئازادیی ڕادەربڕین و داهێنانی هونەری لە باشووری کوردستان ناوبرد و ڕایگەیاند، ئەم بڕیارانە هونەر بەرەو سەردەمی سانسۆری فاشیستی دەگێڕنەوە.
لە ڕاگەیاندراوەکەدا هاتووە، پاساوەکەی پۆلیسی هەرێم بۆ ڕێگریکردن لە نیشاندانی نەشیاوی کارەکتەری پۆلیس و سووکایەتیکردن پێی، هاوشێوەی ئەو ڕێکارە سەرکوتکارییانەیە، کە لە سەردەمی حوکمی مۆسۆلینی لە ئیتاڵیا زیاتر لە سەدەیەک لەمەوبەر پەیڕەو دەکرا، کە تێیدا دەسەڵاتی سەربازی و ئەمنی کۆنترۆڵی تەواوی کایە کولتوورییەکانی دەکرد.
کارگەی شانۆ لە بەشێکی دیکەی پەیامەکەیدا، ڕەخنەی توندی ئاڕاستەی وەزارەتی ڕۆشنبیری و لاوانی حکومەتی هەرێمی کوردستان کرد و ڕایگەیاند، وەزارەت لەبری ئەوەی ببێتە قەڵغانێک بۆ پاراستنی سەربەخۆیی، پێگەی یاسایی و ئازادیی هونەرمەندان، کەچی لەم کێشەیەدا بووەتە جێبەجێکاری ڕێنمایی و پێوەرە ئەمنییەکان، کە لەلایەن دەزگا پۆلیسییەکانەوە دەسەپێندرێن.
هونەرمەندان و ڕێکخەرانی کارگەی شانۆ دووپاتی دەکەنەوە، هونەر ئاوێنەی کۆمەڵگەیە و نابێت هیچ دەزگایەکی ئەمنی یان حکومی سنوور بۆ خەیاڵ و ڕەخنەی بونیادنەرانەی بواری شانۆ و سینەما دیاری بکات و داوا دەکەن دەستبەجێ کەرتی هونەری لەم جۆرە بڕیارە ئەمنییانە بەدوور بگیرێت.
کارگەی شانۆ دژایەتیی خۆی بۆ سانسۆرکردنی کاری هونەری لەلایەن پۆلیسی هەرێمەوە ڕادەگەیەنێت
