بەپێی سەرچاوە ئێرانییەکان، سەردانەکەی پارێزگاری بانکی ناوەندی بە پلەی یەکەم تەرخان کرابوو بۆ تاوتوێکردنی میکانیزمی وەرگرتنەوەی مستەحەقاتە ئێرانییەکان و ئاسانکاری لە دەستگەیشتن بە سەرچاوە داراییەکان.
ئاوهاش ئاژانسی "تسنیم"ی ئێرانی لەسەر زاری بەرپرسەکەوە بڵاویکردەوە: بەشێکی ناوەڕۆکی دانوستانەکانی پارێزگاری بانکی ناوەندی تەرخان کرا بۆ تاوتوێکردنی مەلەفی شایستە داراییەکانی ئێران و ڕێگاکانی ئاسانکاریکردن بۆ سوودوەرگرتن لە یەدەگی دراوە بیانییە کەڵەکەبووەکان لە عێراق.
ئەو بەرپرسە ئاماژەی بەوەش کرد کە کۆمەڵێک ڕێگەچارە و میکانیزمی کردارەکی بۆ یەکلاکردنەوەی ئەم مەلەفە و ئاسانکردنی دەستگەیشتنی بازرگانان و ئابووریناسانی ئێرانی بۆ ئەو پارانە خستووەتەڕوو. ڕوونیشی کردەوە کە کۆی شایستە داراییەکانی ئێران لە عێراق لە ئێستادا دەگاتە نزیکەی 12 ملیار دۆلار، بەڵام ئەم ژمارەیە نەگۆڕ نییە و بەپێی جوڵەی ئاڵوگۆڕی بازرگانی و ڕەوتی دانی پارەکان لە قۆناغە جیاوازەکاندا دەگۆڕێت.
گەشەکردنی ئاڵوگۆڕی بازرگانیی نێوان هەردوو وڵات لەسەر ئاستی ئاڵوگۆڕی بازرگانی، سەرۆکی ژووری بازرگانیی هاوبەش ئاماژەی بەوە کرد کە قەبارەی ئاڵوگۆڕی بازرگانیی نێوان تاران و بەغداد گەشەیەکی بەردەوام بەخۆیەوە دەبینێت.
ناوبراو ڕایگەیاند کە بازرگانیی دووقۆڵی، بێجگە لە ئاڵوگۆڕی کەرتی وزە و نەوت و گاز، ئەمساڵ گەشەی بە ڕێژەی نزیکەی 15٪ تۆمار کردووە. جەختیشی کردەوە کە بەلەبەرچاوگرتنی توانست و ئیمکانیاتەکانی بەردەست هەردوولا، دەرفەتێکی واقیعی هەیە بۆ بەرزکردنەوەی ئاستی ئاڵوگۆڕی بازرگانی تاوەکو بگاتە نزیکەی 20 ملیار دۆلار.