ڕەجەب تەیب ئەردۆغان، سەرۆک کۆماری تورکیا بە شێوەیەکی فەرمی یاسای تایبەت بە پرۆسەی چارەسەریی واژۆ کرد و بڕیارەکە چووە قۆناغی جێبەجێکردنەوە.
ڕەجەب تەیب ئەردۆغان، سەرۆک کۆماری تورکیا ڕایگەیاند: " هیواخوازم یاسای بەهێزکردنی تەبا بەخشینی نیشتمانی و هاوکاریی کۆمەڵایەتی، کە وەک نموونەیەکی سازانی مێژوویی لە پەرلەمانی سەرکەوتووماندا بە پشتیوانیی 467 پەرلەمانتار پەسەند کرا و لە ئەمڕۆوە دەچێتە بواری جێبەجێکردنەوە، ببێتە مایەی خێر و بەرەکەت."
دوای تەواوبوونی ڕێکارە یاساییەکان و واژۆکردنی لەلایەن سەرۆک کۆمارەوە، یاسای تایبەت بە پرۆسەی چارەسەری لە ڕۆژنامەی فەرمیی تورکیادا بڵاوکرایەوە.
بەپێی دەستوور و یاساکانی تورکیا، بە بڵاوبوونەوەی ئەم یاسایە لە ڕۆژنامەی فەرمیدا، بە فەرمی لە سەرجەم دامودەزگاکانی دەوڵەتدا دەچێتە بواری جێبەجێکردنەوە و دەبێتە ڕێنمایی سەرەکی بۆ بەڕێوەبردنی قۆناغەکانی ئایندەی پرۆسەی چارەسەر.
ئەردۆغان جەختی لەسەر گرنگیی ئەم هەنگاوە کردەوە و دەڵێت: «لەم هەنگاوە گرنگەی بۆ داهاتوویەکی ئارام، ئاوەدان و ئاسایشی تورکیا نراوە، سوپاسی سەرجەم ئەو فراکسیۆن و پەرلەمانتارانە دەکەم کە لە سەنگەری جیاوازدابوون بەڵام هەڵوێستێکی ئەرێنیان نیشاندا.»
سەرۆک کۆماری تورکیا بەم جۆرە کۆتایی بە پەیامەکەی هێنا: "پرۆسەکەمان بە ڕوانگەیەک بەڕێوەبردووە کە هەستیارییەکانی تەواوی گەلەکەمان لەبەرچاو گرتووە؛ لەسەر ئەو بنەمایەی یاساکە دیاری کردووە و لەژێر ڕێنمایی دامەزراوە و ئەنجومەنە پەیوەندیدارەکاندا بە هەمان دڵسۆزی و وردبینییەوە بەردەوام دەبین لە بەڕێوەبردنی."