وەزارەتی تەندروستیی ئێران ئاماری نوێی قوربانیانی هێرشە ئاسمانییەکانی ئەمریکای ڕاگەیاند و ئاشکرای کرد، لە 27ی مانگی ڕابردووەوە تاوەکو دوێنێ سێشەممە، 55 کەس گیانیان لەدەستداوە و 600 کەسی دیکەش بریندار بوون.
بە گوێرەی ڕاپۆرتی میدیاکانی ئێران، دوێنێش زنجیرەیەک هێرشی بەهێز ئەنجام دراون و دەنگی زیاتر لە 20 تەقینەوە لە شارەکانی بەندەر عەباس، ئەهواز، ئومێدییە، پارێزگای خوزستان و دوورگەی قشم لە نزیک گەرووی هورمز بیستراوە.
میدیا ناوخۆییەکانی ئێران ئاماژەیان بەوە کردووە، لە ئەنجامی بۆردوومانەکانی ناوچەی ئەهوازدا چار کەس گیانیان لەدەستداوە و پێنج کەسی دیکەش بریندار بوون.
هاوکات جەختیان لەوەش کردووەتەوە، بەهۆی هێرشێکەوە بۆ سەر سنووری پیرانشار لە ڕۆژهەڵاتی کوردستان، زیانی ماددی بەر چەند ئۆتۆمبێلێک کەوتووە، بەڵام تاوەکو ئێستا زانیاریی ورد و دروست لەسەر ژمارەی قوربانیانی ئەو ناوچەیە بەردەست نییە.
تەندروستیی ئێران: لە هێرشەکانی ئەمدواییانەی ئەمریکادا 55 کەس گیانیان لەدەستداوە
