بەڕێوەبەرایەتیی بەرگریی شارستانیی هەولێر بەهۆی زیادبوونی پووش و پەڵاش و نزیکبوونەوە لە وەرزی پایز و هەڵکردنی بای بەهێز، ئاگادارییەکی بڵاوکردەوە و چەندین ڕێنمایی و هۆشداریی ئاراستەی هاوڵاتیان و کاسبکاران کرد بۆ پاراستنی گیان و سەروماڵیان.
بە گوێرەی ڕاگەیەندراوێکی بەرگریی شارستانیی هەولێر، بارانبارینی زۆری زستانی ڕابردوو بووەتە هۆی زیادبوونی ڕووبەری پووش و پەڵاش لە دەشت و دەردا، کە ئەمەش لەگەڵ چوونە ناو وەرزی پایز و هەڵکردنی بای بەهێز مەترسیی ئاگرکەوتنەوەکان بەرز دەکاتەوە.
بۆ ڕێگری لە هەر ڕووداوێکی نەخوازراو، بەرگریی شارستانی جەختی لەسەر پاککردنەوەی دەوروبەر لە پووش و پەڵاش بە پانی 10 تاوەکو 15 مەتر کردووەتەوە، لەگەڵ دوورخستنەوەی پاشماوە گڕگرتووەکانی وەک کارتۆن، تەختە و ڕۆن. هەروەها بڕیاری داوە، سوتاندنی ناڕێکخراوی پووش و پەڵاش بە هەموو شێوەیەک قەدەغەیە.
لەسەر ئاستی ئامادەکاریی فریاگوزاری، داوا کراوە سۆندەی ئاوی پەستانی بەرز یان تەنکەری ئاو لە شوێنە مەترسیدارەکان دابندرێت، لەگەڵ بەگەڕخستنی سیستەمی ئاگادارکردنەوەی دووکەڵ لە کۆگاکاندا و دابینکردنی ئامێری ئاگرکوژێنەوەی بەسەرنەچوو. هاوکات جەخت لە پشکنینی بەردەوامی سیستەمی کارەبا و پاککردنەوەی ژێر تاوەرەکانی کارەبا، محاویلە و مۆلیدەکان کراوەتەوە.
بەڕێوەبەرایەتیی بەرگریی شارستانیی هەولێر داوا لە هاووڵاتیان دەکات لە کاتی تێبینی کردنی هەر دووکەڵ یان ئاگرێکدا، ڕاستەوخۆ پەیوەندی بە ژمارە 115ـەوە بکەن.
بەرگریی شارستانی هەولێر زنجیرەیەک ڕێنمایی بۆ ڕێگری لە ئاگرکەوتنەوە بڵاودەکاتەوە
