لە ئۆپەراسیۆنێکی چەکداریی دەگمەندا، چەکدارانی خێڵی «شەغانیبە»ی پارێزگای بەسرە دوای پێنج کاتژمێر شەڕ و ڕووبەڕووبوونەوە لە کەناراوەکانی سۆماڵ، توانییان کەشتییەکی گواستنەوەی نەوتی ڕفێندراو، کە موڵکی بازرگانێکی خۆیانە لە دەستی چەتەکانی دەریا ڕزگار بوبکەن و 47 کەسی دەستبەسەرکراویش ئازاد بکەن.
ڕۆژی شەممە، 26ی ئەیلولی 2026، زەید موئەییەد، جێگری پارێزگاری بەسرە، ئاشکرای کرد، کەشتییەکە هەڵگری نەوتی عێراقی بووە و موڵکی بازرگانێکی عێراقیی دانیشتووی ئیماراتە، کە نزیکەی مانگێک لەمەوبەر لە کەناراوەکانی سۆماڵ لەلایەن چەتەکانەوە دەستی بەسەردا گیرابوو بە مەبەستی وەرگرتنی سەرانە.
خاوەنی کەشتییەکە بە پشتیوانیی خزمانی خێڵەکەی و بە هەماهەنگی لەگەڵ هێزە ئەمنییەکانی سۆماڵ ئۆپەراسیۆنێکیان ئەنجامدا، کە بووە هۆی ڕووبەڕووبوونەوەیەکی 5 کاتژمێری و ڕزگارکردنی کەشتییەکە بێ ئەوەی هیچ زیانێکی گیانی بەر عێراقییەکان بکەوێت.
لە ئەنجامی ئۆپەراسیۆنەکەدا، جگە لە ئازادکردنی 47 دەستبەسەرکراوەکەی نێو کەشتییەکە، 7 لە چەتە ڕفێنەرەکان (کە کەسانی سۆماڵی و بیانییان تێدابوو) بە دیل گیران و دەست بەسەر چەکەکانیشیاندا گیرا، هاوکات ژمارەیەک لە چەتەکانیش کوژران. دوای سەرکەوتنی ئۆپەراسیۆنەکە، بەشێک لە بەشداربووانی هێرشەکە گەڕاونەتەوە بۆ عێراق و خاوەنی کەشتییەکەش بەرەو دووبەی بەڕێ کەوتووە.
سۆماڵ بەهۆی هەڵکەوتەی جوگرافییی و هەبوونی زیاتر لە سێ هەزار و 300 کیلۆمەتر کەناراو لەسەر زەریای هیندی و کەنداوی عەدەن، بە دەروازەی سەرەکی بەرەو تەنگەی بابولمەندەب و دەریای سوور دادەنرێت، کە یەکێکە لە گرنگترین ڕێڕەوە ئاوییەکانی جیهان بۆ تێپەڕبوونی کەشتییە نەوتهەڵگرەکان بەرەو ئەوروپا.
چەکدارانی خێڵێکی بەسرە کەشتییەکی ڕفێندراوی نەوتیان لە کەناراوەکانی سۆماڵ ڕزگار کرد
