ڕوانگەی سووری بۆ مافەکانی مرۆڤ ڕایگەیاند، هێزە چەکدارەکانی سەر بە حکومەتی کاتیی سوریا بە زیاتر لە 200 ئۆتۆمبێلی سەربازییەوە هێرشیانکردووەتە سەر گوندەکانی "تل ئەران" و "تل حاسڵ" لە دەوروبەری حەلەب کە زۆرینەی دانیشتووانەکەی کوردن، بەهۆیەوە چەندین کەس بریندار بوون و ژمارەیەک گەنجیش ڕفێندراون.
بەگوێرەی ڕاپۆرتی ڕوانگەی سووری، ئەو هێزە چەکدارانە دوای پشکنین و ئەشکەنجەدانی هاووڵاتییان، لانی کەم 10 گەنجی ئەو دوو گوندەیان بە تۆمەتی هەبوونی پەیوەندی لەگەڵ حکومەتی پێشووی سووریادا دەستگیرکردووە و بەرەو شوێنێکی نادیار ڕفاندوویانن.
ڕوانگەی سوری ئاماژەی بەوەش کردووە، هێرش و گەمارۆی سەر ئەو دوو گوندە کوردنشینەی حەلەب هێشتا بەردەوامە؛ بەشێکی زۆر لە ژنان و خەڵکی سڤیل ڕووبەڕووی لێدان و ئەشکەنجە بوونەتەوە و بەهۆی سەختیی برینەکەیەوە، ژنێک ڕەوانەی نەخۆشخانە کراوە.
لەسەر هەمان پرس، ئاڵدار خەلیل، ئەندامی دەستەی هاوسەرۆکایەتیی پارتی یەکێتیی دیموکرات (پەیەدە) لە پۆستێکدا لە تۆڕی کۆمەڵایەتیی ئێکس، کاردانەوەی تووندی نیشاندا و ڕایگەیاند: "ئەو هێرشانەی دەکرێنە سەر تل ئەران و تل حاسڵ بە هیچ شێوەیەک قبووڵکراو نین."
ئەو سەرکردەیەی پەیەدە هۆشداریشی دا کە ئەم جۆرە پەرەسەندنانە مەترسییەکی جددین بۆ سەر ژیانی خەڵکی مەدەنی، پێکەوەژیان، یەکێتیی نەتەوەیی و داهاتووی سووریا، ڕاشیگەیاند کە ئەم هێرشانە دەرئەنجامی سەپاندنی واقیع و ڕاستییەکی نوێیە لە سوریادا.