زانکۆی ڕۆژاڤا سەرکۆنەی بڕیارێکی وەزارەتی پەروەردەی سووریای کرد سەبارەت بە سنووردارکردنی خوێندنی زمانی کوردی، و بە هەنگاوێکی پاشەکشێ ناوی برد لە مۆدێلی پەروەردەیی ناوچەکەدا.
لە ڕاگەیەندراوەکەی زانکۆی ڕۆژاڤا دا هاتووە کە لە 12 ساڵی ڕابردوودا ئەزموونێکی بەرفراوان لە بواری پەروەردە بەدەست هاتووە و زمانی کوردی بووەتە زمانی سەرەکی، بۆیە قەتیسکردنی وەک زمانی دووەم و تەنیا لە چوارچێوەی سێ وانەدا، دەرئەنجامی نەرێنی بە دوای خۆیدا دەهێنێت.
زانکۆکە جەختی لەوە کردەوە کە نابێت زمانی کوردی لە سووریادا سنووردار بکرێت و پێویستە لە چوارچێوەی ڕێککەوتنامە نێودەوڵەتییەکاندا مافی خوێندن بە زمانی دایک بۆ سەرجەم قوتابییانی ڕۆژاڤای کوردستان مسۆگەر بکرێت.