قوباد تاڵەبانی، جێگری سەرۆکوەزیرانی هەرێمی کوردستان لە بەغدا لەگەڵ باڵیۆزانی وڵاتانی ئەوروپا کۆبووەوە؛ ڕایگەیاند، دواخستنی زیاتری پێکهێنانی حکومەتی نوێی هەرێمی کوردستان زیانی قەرەبوونەکراو بە پێگەی هەرێم دەگەیەنێت و بەردەوامبوونی حکومەتی کاربەڕێکەریش بە خاڵێکی لاواز ناوبرد.
لە کۆبوونەوەکەدا، قوباد تاڵەبانی جەختی لەسەر سیاسەت و هەڵوێستی نەگۆڕی هەرێمی کوردستان کردەوە کە نابێتە بەشێک لە شەڕ و ململانێ ناوچەیی و نێودەوڵەتییەکان، بەڵکو هاوشانی هاوبەشەکانی کار دەکات بۆ هێورکردنەوەی ئاڵۆزییەکان. جێگری سەرۆکوەزیران پاڵپشتیی تەواوی خۆی بۆ حکومەتی فیدراڵ لە پرۆسەی بەرەنگاربوونەوەی گەندەڵی و پاراستنی سەروەریی عێراق دووپاتکردەوە.
قوباد تاڵەبانی ئاماژەی بەوەش کرد، دۆخێکی نوێ لە ناوچەکەدا هاتووەتە ئاراوە و پێویستە لایەنە سیاسییەکان بە لەبەرچاوگرتنی هەڕەشە و ئاڵنگارییەکان، بەرپرسیارانە مامەڵە بکەن و بە تێگەیشتنی نوێوە پەلە بکەن لە پێکهێنانی حکومەتی نوێی هەرێمی کوردستان.