وەزارەتی دارایی و ئابووریی حکومەتی هەرێمی کوردستان خشتەیەکی نوێی دابەشکردنی مووچەی بۆ مامۆستایانی گرێبەست و بەشێک لە فەرمانبەرانی میلاکی هەمیشەیی و گرێبەست ڕاگەیاند.
بە گوێرەی ڕاگەیەندراوێکی فەرمیی ڕاگەیاندنی وەزارەتی دارایی و ئابووری کە ئەمرۆ شەممە، 16ی ئایاری2026 بڵاوکراوەتەوە، بڕیاردراوە ڕۆژی یەکشەممە، ڕێکەوتی 17ی ئایاری 2026، دەست بە دابەشکردنی مووچەی مانگی نیسانی مامۆستایانی گرێبەست لەسەر میلاکی وەزارەتی پەروەردە و وەزارەتی خوێندنی باڵا و توێژینەوەی زانستی بکرێت.
دارایی هەرێمی کوردستان ئاماژەی بەوەش کردووە، هاوکات لەگەڵ مامۆستایانی گرێبەست، لە هەمان ڕۆژدا (یەکشەممە) مووچەی مانگی نیسانی سەرجەم ئەو فەرمانبەرە هەمیشەیی و گرێبەستانەش دابەش دەکرێت کە لە دوای ڕێکەوتی 1ی تەممووزی 2024ـەوە لە وەزارەت و دامەزراوە جیاوازەکانی حکومەتی هەرێمی کوردستان دەستبەکاربوون.
وەزارەتی دارایی لە ڕاگەیەندراوەکەیدا ڕوونکردنەوەی داوە کە شایستە دارایی و مووچەی ئەم چینە لە فەرمانبەران و مامۆستایان، بە تەواوی لەسەر بودجە و داهاتی ناوخۆی هەرێمی کوردستان دابین و خەرج دەکرێت.
ئەم بڕیارەی وەزارەتی دارایی دوای ئەوە دێت کە لە چەند مانگی ڕابردوودا پرسی وردبینی و دابینکردنی شایستەی دارایی فەرمانبەرانی نوێ و مامۆستایانی گرێبەست، یەکێک بوو لە پرسە گفتوگۆهەڵگرەکانی نێوان هەولێر و بەغدا، و ئێستاش لەسەر داهاتی ناوخۆیی فەرمانی خەرجکردنی مووچەکانیان دراوە.