لە چاوپێکەتنێکیدا لەگەڵ کەناڵی (مەدیا خەبەر تیڤی)، موستەفا قەرەسوو، ئەندامی کۆنسەی بەڕێوەبەریی کەجەکە لەبارەی دوا پێشهاتەکانی پرۆسەی ئاشتی، دیداری ئەم دواییەی دەم پارتی لەگەڵ عەبدوڵا ئۆجالان و پرسی یاسای چوارچێوە لە پەرلەمانی تورکیا، بەراورد و هەڵسەنگاندنی نوێی ڕاگەیاند.
قەرەسوو ئاماژەی بەوە کرد کە ئەنجام نەدانی دیدار لەگەڵ عەبدوڵا ئۆجالان بۆ ماوەی دوو مانگ دژی سرووشتی پرۆسەکە بووە و لە ناو بازنە جیاوازەکاندا پرسیار و نیگەرانی دروستکردبوو.
بەڵام ئەنجامدانی ئەم دیدارە پێنج سەعاتییەی دوایی دەریخست کە سەرەڕای ئاستەنگەکان، گفتوگۆکان بۆ چارەسەرکردنی گرفتەکان بەردەوامن و ئاماژەیەک بوو بۆ هەوڵەکان لە پێناو بەردەوامییدان بە پرۆسەکە.
سەبارەت بە ناوەرۆکی دیدارەکە و ڕەشنووسی یاسای چوارچێوە کە بڕیارە هەفتەی داهاتوو بچێتە ڕۆژەڤی پەرلەمانی تورکیاوە، قەرەسوو ڕوونی کردەوە کە ئۆجالان جەختی لە دروستکردنەوەی خوشک-برایەتیی کورد و تورک کردووەتەوە لەسەر بنەمای مافە بنەڕەتییەکانی گەلی کورد.
هەروەها دەربارەی ڕەشنووسەکەش ئۆجالان ئاماژەی بەوە داوە کە سەرەڕای کەموکوڕییەکانی، دەکرێت وەک سەرەتایەک و دەروازەیەک سەیر بکرێت بۆ پێشخستنی هەنگاوەکانی داهاتوو.
لە بەشێکی دیکەی قسەکانیدا، ئەندامی کۆنسەی بەڕێوەبەریی کەجەکە ڕایگەیاند کە ئەوان چاوەڕێی گەیشتنی دەقی تەواوی ڕەشنووسەکەن تاوەکو هەڵوێستی فەرمی و ڕوونی خۆیانی لەسەر دەرببڕن.
ناوبراو ڕەخنەی لە بەکارهێنانی دەستەواژەی وەک "ڕێکخستنی تیرۆر" گرت و ئاماژەی بەوە کرد کە خەباتی چەکداری بەرامبەر تورکیا کۆتایی پێهاتووە، هەر کاتێکیش زەمینەی سیاسی و ئازادیی بڕیاردان ڕەخسا، ئامادەن بە تەواوی ببنە بەشێک لە تێکۆشانی سیاسیی دیموکراتیک.
لە کۆتاییدا قەرەسوو جەختی لەوە کردەوە کە سەرکەوتنی پرۆسەکە تەنیا بە وەستان و چاوەڕوانی لەسەر هەنگاوەکانی دەوڵەت بەدەستنایەت، بەڵکو پێویستە هێزەکانی دیموکراسی و گەلی کورد بە هێزی ڕێکخراوەیی خۆیان بە بەهێزی لە مەیدانەکەدا بوەستن و پشتگیری لە پێشخستنی ڕێڕەوی ئاشتی بکەن.