زاگرۆس ئەندەریاری بەرپرسی پەیوەندییەکانی دەرەوەی
ئەندەریاری لە لێدوانێکدا ئاماژەی بەوە دا کە هەنگاوەکان بۆ چارەسەری دیموکراسییانەی پرسی کورد لە تورکیا کاریگەریی ڕاستەوخۆی لەسەر هەموو پارچەکانی کوردستان دەبێت و دەتوانێت زەمینە خۆش بکات بۆ ئەوەی لە ئێرانیشدا فشارە ئەمنییەکان کەم ببنەوە و کێشەکان بەرەو چارەسەری سیاسی بڕۆن.
سەبارەت بە دۆخی ڕۆژهەڵات، گوتەبێژی دیپلۆماسیی پژاک جەختی کردەوە کە تاران مێژوویەکی درێژی لە وەڵامدانەوەی داواکارییە نەتەوەیی و دیموکراسییەکانی کورد هەیە بە زیندان، لەسێدارەدان و سەرکوتکردن.
سەرکەوتنی پرۆسەی سیاسی لە تورکیا دەکرێت ببێتە هۆی هاندانی داواکارییەکان لە ئێران بۆ ئازادکردنی زیندانیانی سیاسی و دانپێدانان بە مافە سەرەتاییەکانی گەلی کورددا.
لە بەشێکی تری قسەکانیدا، ئەندەریاری ئاماژەی بەوە کرد کە هاوپەیمانیی نێوان پارتە سیاسییەکانی ڕۆژهەڵات هەلێکی گرنگە بۆ کەمکردنەوەی پچڕپچڕی و دروستکردنی گوتارێکی هاوبەش، تاوەکو بتوانن ببنە لایەنێکی متمانەپێکراو لە هەر گۆڕانکارییەکی سیاسیی داهاتوودا لە ناوچەکەدا.