موقتەدا سەدر، ڕێبەری ڕەوتی نیشتمانیی شیعە، لە ڕاگەیەندراوێکدا لە 20ی ئەیلولی 2026دا داوای لە ئەمریکا و هێزەکانی هاوپەیمانیی نێودەوڵەتی کرد کە بە تەواوەتی پابەندی وادەی دیاریکراوی کشانەوەیان بن لە عێراق، کە ڕێککەوتی 30ی ئەیلولە، و جەختی کردەوە کە لە دوای ئەو ڕێککەوتەوە هیچ جۆرە دەستوەردانێکی دەرەکی لە کاروباری ناوخۆییی وڵاتدا قبووڵکراو نییە.
سەدر ئاماژەی بەوە کرد، کشانەوەی هێزە بیانییەکان لە بەرژەوەندیی عێراق، هاوپەیمانان و تەواوی جیهاندایە، هاوکات هۆشداریی دا لەوەی ئەو هەنگاوە نەبێتە دەرفەتێک بۆ دەستوەردانی وڵاتانی دراوسێ و نادراوسێ لە سەروەریی عێراقدا و داوای لە سیاسییەکانی وڵات کرد جارێکی دیکە پەنا بۆ دەستوەردانی ئەمریکا نەبەنەوە.
ڕێبەری ڕەوتی نیشتمانیی شیعە ڕوونی کردەوە، هێزە ئەمنییەکان لە ڕێگەی هێزی وشکانی، پاراستنی سنوور و هێزی ئاسمانییەوە توانای تەواویان بۆ پاراستنی نیشتمان هەیە بە مەرجێک تەنیا لەژێر فەرماندەییی حکومەتی ناوەندیدا بن، هەروەها هیواخواز بوو 30ی ئەیلول ببێتە دەستپێکی گەشەسەندنی عێراق و کۆتاییهاتنی گەندەڵی، دیکتاتۆری و داگیرکاری.
موقتەدا سەدر داوای پابەندبوون بە وادەی کشانەوەی هێزەکانی هاوپەیمانان لە عێراق دەکات
