کۆمەڵەی ژنانی ئازادیی ڕۆژهەڵاتی کوردستان (کەژار) ڕایگەیاند، دوو کەس لە ئەندامانی ڕێکخراوەکەیان لە شاری ورمێ لەلایەن هێزە ئەمنییەکانی کۆماری ئیسلامیی ئێرانەوە دەستگیر کراون و بۆ شوێنێکی نادیار گواستراونەتەوە؛ جەختیشی کردەوە کە بەرپرسایەتیی تەواوی گیان و تەندروستییان لە ئەستۆی دەسەڵاتی ئێراندایە.
بەگوێرەی ڕاگەیەندراوی کەژار، ئەو دوو ژنە چالاکە بە ناوەکانی (زەهرا پیردێهقان) ناسراو بە (دجلە ماکۆ)، تەمەن 32 ساڵ و خەڵکی چالدران، و (پەروین قزڵباش) ناسراو بە (ئادار ماکۆ)، تەمەن 32 ساڵ و خەڵکی ماکۆ، لە کاتی ئەنجامدانی چالاکیی رێکخستنیی ژناندا لە شاری ورمێ، لە چەند کاتی جیاوازدا لەو شارەدا بێسەروشوێن کرابوون و دواتر دەرکەوتووە کە لەلایەن هێزە ئەمنییەکانەوە ڕفێنراون.
ڕێکخراوەکە ئاماژەی بەوەش کرد، سەرەڕای تێپەڕبوونی نزیکەی سێ مانگ بەسەر دەستگیرکردن و بێسەروشوێنکردنیان، تا ئێستاش هیچ زانیارییەک لەسەر چارەنووس و دۆخی تەندروستیی ئەم دوو ئەندامەیان لەبەردەستدا نییە و دەزگا ئەمنییەکان ئامادە نیین وەڵامی بنەماڵەکانیان بدەنەوە، بەڵکو لە ڕێگەی گوشارخستنە سەر کەسوکاریانەوە هەوڵی ڕێگریکردن لە هەر بەدواداچوونێکی مەدەنی و یاسایی دەدەن.
لە کۆتایی ڕاگەیەندراوەکەیدا، کەژار کۆماری ئیسلامیی ئێران بە بەرپرسی سەرەکیی پاراستنی گیان و تەندروستیی ئەندامەکانی زانی و داوای کرد بەپەلە شوێنی ڕاگرتنیان ئاشکرا بکرێت؛ هاوکات داوای لە ڕێکخراوە نێودەوڵەتییەکانی مافی مرۆڤ و ژنان کرد کە لە بەرامبەر ئەم پێشێلکاری و ڕەفتارە ئەمنییانە بێدەنگ نەبن.