بەهۆی بەرزبوونەوەی پلەکانی گەرما و سەرهەڵدانی قەیرانی کورتهێنانی وزە، ئەمرۆ چوارشەممە 5ی ئابی 2026، دەوامی فەرمی لە سەرجەم فەرمانگەکان، دەزگاکانی حکومەت و دامەزراوەکانی بیمە لە پارێزگاکانی سنە و کرماشانی ڕۆژهەڵاتی کوردستان بە تەواوی ڕاگیرا.
بە گوێرەی زانیارییەکان، شەپۆلێکی توندی گەرما ناوچەکەی گرتووەتەوە و هاوکات بوونی کێشەی بەردەوامی پچڕانی کارەبا بارودۆخێکی سەختی ژیانی بۆ هاوڵاتییانی پارێزگاکانی ڕۆژهەڵاتی کوردستان دروست کردووە و بووەتە هۆی دروستبوونی قەیرانی خزمەتگوزاری.
دامەزراوە تەندروستییەکان هۆشدارییان داوە، بەرزبوونەوەی پلەکانی گەرما ڕێژەی تووشبوون بە نەخۆشییە پەیوەندیدارەکانی وەک وشکبوونەوە، ماندووبوونی توند و جەڵتەی گەرمای بە شێوەیەکی بەرچاو بەرز کردووەتەوە.
تەندروستیی ناوچەکە داوای لە بەساڵاچووان، منداڵان و ئەو کەسانەی نەخۆشیی درێژخایەنیان هەیە کردووە لە ماڵەکانیان بمێننەوە و خۆیان لە بەرکەوتنی ڕاستەوخۆی خۆر بپارێزن.
دەوامی فەرمانگەکانی سنە و کرماشان ڕاگیرا
