ئەنجوومەنی باڵای دادوەریی عێراق ڕایگەیاند کە دادگای لێکۆڵینەوەی کەرخی یەکەم قۆناغی لێکۆڵینەوەی لە دۆسیەی ٥٧٠٤ تۆمەتباری داعشدا تەواو کردووە، کە پێشتر لە باکوور و ڕۆژهەڵاتی سووریاوە (ڕۆژاوا) بۆ عێراق گواسترابوونەوە.
ئەم زیندانیانە لە مانگی کانوونی دووەمی ئەمساڵدا، بەهۆی تێکچوونی دۆخی ئەمنی و هێرشەکانی حکوومەتی سووریا بۆ سەر ناوچەکانی ڕۆژاوا و لە ترسەی دەربازبوونیان لە گرتووخانەکانی هەسەدە، ڕووە و عێراق گواسترابوونەوە.
بەپێی ڕاگەیەندراوی دەسەڵاتی دادوەری، لە کۆی گشتیی زیندانیانەکان، ٣٤٩٧ کەسیان هاووڵاتیی سووریان، ٤٧٤ کەس عێراقین و ئەوانی تر خەڵکی ٦٧ نەتەوەی جیاوازن، کە ١٦ وڵاتی عەرەبی، ١٩ وڵاتی ئەوروپی و ٣٢ وڵاتی تری جیهان لەخۆ دەگرن.
هەروەها تا ئێستا هاووڵاتییەکی ئەمریکی و یەکێکی فینلەندی ڕادەستی وڵاتەکانیان کراونەتەوە، و حەوت عێراقیش بە نەبوونی بەڵگە ئازاد کراون.
دادگا ئاماژەی بەوەش کردووە کە لەناو لێکۆڵینەوەکاندا ژمارەیەک سەرکردە و کەسی زۆر مەترسیداری داعش دۆزراونەتەوە کە دەستیان لە تاوانی گەورەدا هەبووە، لەوانەش شەش کەس کە راستەوخۆ تێوەگلاون لە رفاندن و کۆیلەکردنی ئێزدییەکان لە ساڵی ٢٠١٤دا.
ئەم زیندانیانە لە زیندانی کەرخ لە نزیک فڕۆکەخانەی نێودەوڵەتیی بەغدا ڕگیراون، لە کاتێکدا ئەو ناوچەیە بەهۆی ململانێ و جەنگی نێوان ئەمریکا-ئیسرائیل و ئێران لە کۆتایی شوباتی ڕابردووەوە، چەندین جار ڕووبەڕووی هێرشی درۆنی بووەتەوە.