ئەنجوومەنی وەزیرانی عێراق بە سەرۆکایەتیی عەلی زەیدی، سەرۆکوەزیران، کۆبوونەوەی ئاسایی خۆی ساز کرد و تێیدا چەندین بڕیاری گرنگی لە بواری ڕووبەڕووبوونەوەی گەندەڵی، وزە و پەروەردە دەرکرد.
بەگوێرەی ڕاگەیانراوی فەرمیی کۆبوونەوەکە، بە پێچەوانەی چاوەڕوانییەکانەوە، هیچ گفتوگۆیەک لەبارەی پرسی مووچە و داهاتی نانەوتیی هەرێمی کوردستان نەکراوە.
دانی مۆڵەتی 60 ڕۆژ بۆ یەکلاکردنەوەی دۆسیەکانی گەندەڵی
حکومەتی عێراق لەم کۆبوونەوەیەدا تیشکی خستە سەر چڕکردنەوەی هەوڵەکانی بۆ دژایەتیکردنی گەندەڵی و بڕیاردرا کە کارەکانی لیژنەی لێکۆڵینەوە لەم چوارچێوەیەدا تەنیا لە ماوەی 60 ڕۆژدا تەواو بکرێن.
هاوکات بڕیار درا بە هەماهەنگی لەگەڵ دەسەڵاتی دادوەری و دادگاکان، بەدواداچوونی جدی بۆ ئەو داوا یاساییانە بکرێت کە ماوەیەکی زۆرە تۆمار کراون و یەکلا نەکراونەتەوە.
لایەنێکی تری بڕیارەکە، پابەندکردنی سەرجەم دامەزراوە حکومییەکانە بە دەستنیشانکردنی دیاردەکانی گەندەڵی و ڕاهێنانی فەرمانبەران بۆ ڕووبەڕووبوونەوەی.
گرێبەستی نوێی کارەبا و چاپکردنی پەڕتووکەکانی قوتابخانە
لە بەشێکی تری کۆبوونەوەکەدا، ئەنجوومەنی وەزیران چەند بڕیارێکی گرنگی ئابووری و خزمەتگوزاریی دەرکرد کە گرنگترینیان ئەمانەن:
ڕێکخستنی دارایی: بڕیاردرا بە ڕێکخستنەوەی خەرجییە گشتییەکانی دەوڵەت بە مەبەستی ڕێگریگرتن لە هەڵاوسانی ئابووری.
کەرتی وزە: پێدانی دەسەڵات بە وەزارەتی کارەبا بۆ واژۆکردنی گرێبەستێکی نوێ لەگەڵ کۆمپانیایەکی ئەمریکی بە مەبەستی پەرەپێدانی کەرتی وزە و دابینکردنی کارەبای پێویست.
کەرتی پەروەردە: پێدانی دەسەڵات بە وەزارەتی پەروەردە بۆ ئەوەی سەرپشک بێت لە پرسی گرێبەستکردن لەگەڵ کۆمپانیا ناوخۆیی و بیانییەکان بە مەبەستی چاپکردنی پەڕتووکەکانی قوتابخانە بۆ ساڵی نوێی خوێندن.
پەراوێزخستنی پرسی 120 ملیار دینارەکەی داهاتی ناوخۆی هەرێم و پرسی مووچە لە کۆبوونەوەی ئەمڕۆی بەغدا، نیشانەی ئەوەیە کە هێشتا لێکتێگەیشتنی کۆتایی لە نێوان شاندی دارایی هەرێم و وەزارەتی دارایی فیدراڵ نەهاتووەتە بەرهەم. ئەم بێدەنگییەی بەغدا ئەگەرچی دۆخی مووچەی فەرمانبەرانی هەرێم دەخاتە دۆخێکی نادیار و چاوەڕوانییەوە، بەڵام دەرفەت دەداتە لایەنە تەکنیکییەکان تاوەکو لە دەرەوەی کۆبوونەوەی وەزیران بگەنە ڕێککەوتنێکی گشتگیر.