کۆمیتەی ڕێگری لە ئەشکەنجەدانی ئەوروپا (CPT) ڕاپۆرتی خۆی سەبارەت بە سەردانەکانی بۆ زیندانەکانی تورکیا لە ساڵانی 2021 و 2024 بڵاوکردەوە و تێیدا هۆشداری دەدات لەبارەی زیادبوونی خێرای ژمارەی زیندانیان و خراپیی ڕەوشەکە.
بەگوێرەی ڕاپۆرتەکە، ژمارەی زیندانیان لە گرتوخانەکانی تورکیادا لە ماوەی تەنها سێ ساڵدا لە 192 هەزار کەسەوە بازی داوە و گەیشتووەتە 338 هەزار کەس. CPT جەختی لەوە کردووەتەوە که دروستکردنی زیندانیی نوێ کێشەی قەرەباڵغیی زۆر چارەسەر ناکات.
لە ڕاپۆرتەکەدا ئاماژە بەوە کراوە کە لە پڕۆسەکانی دەستبەسەرکردن و زیندانیکردندا ڕەفتارەکانی وەکو ئەشکەنجە، لێدان و بەکارهێنانی ڕێگاکانی وەک "فەلەقە" هێشتا بەردەوامن. هەروەها لە زیندانەکانی باقرکۆی و ئەنتالیا پێشێلکاری و ڕەفتاری خراپ بەرامبەر ژنان و منداڵان تۆمار کراون، و داوا کراوە شوێنی تایبەت و گونجاو بۆ ئەو دایکانە دروست بکرێت کە منداڵەکانیان لەگەڵدایە.
ڕاپۆرتەکە سەرنجی خستووەتەسەر ئەوەش کە کەمیی پزیشک، کارمەندانی تەندروستی و خزمەتگوزارییە دەروونییەکان لە ناو زیندانەکاندا لەم ماوەیەشدا بەردەوام بووە و کێشەیەکی سەرەکییە.