بە بۆنەی تێپەڕبوونی چوار ساڵ بەسەر گیانبەختکردنی ژینا ئەمینیدا، ئەمجەد ئەمینیی باوکی لە پەیامێکدا ڕایگەیاند کە سەرەڕای تێپەڕبوونی کات، ئازارەکان و غیابی کچەکەیان بۆ ساتێکیش کاڵ نەبووەتەوە و هێشتا وەک ڕۆژی یەکەم یادەوەرییەکانیان لەگەڵ خۆیان هەڵدەگرن.
ناوبراو لە پەیامەکەیدا ئاماژەی بەوە دا کە "کچێکمان هەبوو، ئەوانیش کچەکەیان لێ وەرگرتین، بەڵام خۆشەویستیی مرۆڤەکان هەزاران منداڵی دیکەی هێناوەتە ناو خێزانەکەمانەوە"، و جەختیشی لەوە کردەوە کە ئەو هاودەنگی و خۆشەویستییە مەزنەی لەنێو خەڵکدا دروست بووە، هەرگیز لەبیر ناکەن.
ئەمجەد ئەمینی ئەوەشی خستە ڕوو که بۆ دایک و باوکێک کات مانای جیاوازی هەیە و هەندێک ئازار هەرگیز لەگەڵ تێپەڕبوونی ڕۆژەکاندا کەم نابنەوە، تەنها مرۆڤ فێری ئەوە دەبێت چۆن لەناو خۆیدا هەڵیانبگرێت، لە کۆتایی پەیامەکەشیدا نووسیویەتی: "جینا، کچەکەم، ناوت و یادەوەریت تا دوا هەناسەمان لەگەڵمان دەبێت".