Parêzgarê Hesekê Nûredîn Ehmed îro li avahiya parêzgariyê pêşwaziya şandeyeke Wezareta Dadê ya Hikûmeta Veguhêz a Sûriyê kir.
Şande ji serokatiya cîgirê giştî yê serokkomariya Hikûmeta Veguhêz a Sûriyê Hesan Turbe, endamê wezareta dadê Mihemed Nasir û nûnerê serokê hikûmetê Ehmed Hîlalî pêk tê.
Her wiha şandeyê serdana avahiya dadweriya civakî ya li bajarê Hesekê jî kir û li wir bi parêzeran re hevdîtin kir.
Piştre jî wan serdana girtîgeha Xuwêranê ya li bajarê Hesekê jî kir û li wir civiyan.
Di civînê de şandeyê li hev kir ku mekanîzmeyeke nû ya rêxistinkirina karê girtîgehan were avakirin.
Her wiha piştî bidawîbûna civînê cîgirê giştî yê serokkomariya Hikûmeta Veguhêz a Sûriyê Hesan Turbe di kongreyeke çapemeniyê de wiha got:
"Bi hevahengiya di navbera rêveberiya girtîgehan a Wezareta Hundirîn de, me girtîgeha Xuwêran wergirt.
Em derbasî nava girtîgehê bûn û me hin girtî dîtin, em ê ofîseke zagonî ya girêdayî dozgeriya giştî ya dadweriya civakî di girtîgehê de ava bikin.
Ev ofîs dê bi dozgeriya giştî ya Wezareta Dadê ve girêdayî be û dê kar û barên girtiyan bişopîne."
Her wiha ji bo wergirtina girtîgeha Elayayê şandeyê berê xwe da bajarê Qamişloyê.
Ev serdan di çarçoveya peymana 29'ê çileyê de ya di navbera Hikûmeta Veguhêz a Sûriyê û Hêzên Sûriya Demokratîk QSD'ê de, ji bo bicihanîna entegrekirina saziyên dadweriyê yên parêzgeha Hesekê hat kirin.
