Şandeya DEM Partî û DBP’ê ku ji bo tevlî kongreya Hevpeymaniya Sosyal Demokrat a Cîhana Erebî bibin 3 rojin li Silêmaniyê ye, serdana gora Mam Celal Talebanî kir.
Hevserokê DEM Partiyê Tuncer Bakirhan li ser gora Mam Celal axaftinek kir û ev tişt anî ziman:
"Mam Celal ne tenê ji bo Başûrê Kurdistanê xebat kiriye, di heman demê de ji bo her çar parçeyên Kurdistanê di nava hewldanan de bû.
Dostê nêzîk ê birêz Ocalan bû û bi hev re ji bo mafê rewa yê gelê Kurd di nava hewldanan de bûn. Mam Celal her tim hewl dida aştiya di navbera Kurd û dewleta Tirk de bi serbikeve."
Bakirhan derbarê pêvajoya aştiyê ya li Tirkiyeyê de jî wiha axivî:
"Tevî hêdî bejî, li Tirkiyeyê aştî bi awayek baş pêşve diçe û ev yek cihê kêfxweşiyê ye. Ji ber ku pirsgirêkek xwedî dîrokeke sedsalî heye, em baweriya xwe bi gel û rêxistina xwe tînin.
Em li bendê ne ku di rojên pêş de pêşketinên nû çêbibin."
Tuncer Bakirhan got ku heya niha jî peyamên weke yek dewlet û yek netew ji aliyê dewletê ve tên dayîn û ev jî xizmeta qonaxê nake û axaftina xwe wiha qedand:
"Pêvajoya aştiyê derfeta dawî ya Tirkiyeyê ye, têkoşîna me hemû ji bo serxistina pêvajoyê ye."
Hêjayî gotinêye, şandeya DEM Partî û DBP’ê ya ku ji Hevserokê Giştî yê DEM Partiyê Tuncer Bakirhan, Hevserokên Giştî yên DBP’ê Keskîn Bayindir û Çîgdem Kiliçgun Ûçar, herwiha parlamenterên DEM Partiyê Gûlcan Kaçmaz, Sabahet Erdogan Saritaş, Ebru Gûnay, Murad Sarisaç û Cengîz Çandar pêktên, di 27’ê Tebaxê de ji bo tevlî Kongreya
Hevpeymaniya Sosyal Demokrat a Cîhana Erebî bibin, çûne Silêmaniyê.