Duh fermandarê giştî yê Hêzên Sûriyeya Demokratîk (QSD) Mazlûm Ebdî, hevseroka Daîreya Têkiliyên Derve ya Rêveberiya Xweser Îlham Ehmed û fermandara Yekîneyên Parastina Jin (YPJ) Rohilat Efrîn li Şamê bi serokê hikumeta veguhêz a Sûriyeyê Ehmed Şeri re civiyan.
Şandeya Bakur û Rojhilatê Sûriyeyê li ser rûpela xwe ya fermî ya X'ê agahiyên li ser hevdîtina li Şamê ya bi nûnerên hikumeta veguhêz a Sûriyeyê re, eşkere kirin.
Şande: 4 bendên sereke hatin nîqaşkirin, lê tu belgeyên fermî nehatin îmzekirin
Şandeyê diyar kir ku di hevdîtinê de 4 bendên sereke hatin nîqaşkirin, lê tu belgeyên fermî nehatin îmzekirin.
Şandeyê da zanîn ku wan bi devkî pêşniyara entegrasyona QSD'ê û Hêzên Ewlekariya Hundirîn ji bo avakirina artêşeke rêxistinkirî ji bo tevahî gelê Sûriyeyê, pêşkêş kiriye.
Şande: Me li ser pêkanîna agirbesteke giştî li hev kiriye
Her wiha şandeyê destnîşan kir ku wan li ser pêkanîna agirbesteke giştî û yekser li Bakur û Rojhilatê Sûriyeyê û Helebê û sererastkirina destûra Sûriyeyê ku nûnertiya hemû pêkhateyan bike, li hev kiriye.