Dr. Neşmîl Qasimlo, biraziya Dr. Abdulrehman Qasimlo ku di 13'ê Tîrmeha 1989'an de, di dema dan û standinên bi nûnerên Dewleta Îranê re li Vîyanayê hatibû kuştin, ji sala 1997'an û vir ve bi gelek şandeyan serdana Kurdistanê dike.
Di van serdanan de, binpêkirinên mafên mirovan li herêmê lêkolîn dike û belge dike.
Neşmîl Qasimlo Pêvajoya Aştî û Civaka Demokratîk û azadiya fizîkî ya Rêberê Damezrîner ê PKK`ê Abdullah Ocalan nirxand.
Neşmîl Qasimlo got ku ew bi rêxistinên civaka sivîl, komele û partiyên siyasî re dicive û li cihê bûyerê guh dide binpêkirinên mafên mirovan.
Dr. Neşmîl Qasimlo diyar kir ku, di serdanên xwe de yên ku ji sala 1997'an û vir ve pêk tîne, wê guhertinên girîng dîtiye û got:
"Ev demeke dirêj e ez têm Tirkiye û Kurdistanê.
Em bi rêxistinên sivîl re dicivin û ew ji me re qala tiştên ku wan jiyaye û zehmetiyên ku ew pê re rû bi rû mane, dikin.
Ez ji sala 1997'an û vir ve têm. Di vê demê de gelek tişt guheriye.
Dema ku ez li wê demê vegeriyam, partiyên Kurdî tunebûn; ew her tim dihatin girtin, lê niha em di parlamentoyê de ne.
Em ji vê yekê pir kêfxweş bûn. Ev gavên pir mezin bûn.
Lê berî wê, valakirina gundan û koçberiya mirovan demên pir xirab bûn.
Kurd gav bi gav ber bi pêş ve diçin û her ku ew ber bi pêş ve diçin, ew rêya xwe baştir dikin.
Ew tiştên ku ew girîng dibînin dikin."
Neşmîl Qasimlo diyar kir ku yek ji binpêkirinên mafên mirovan sînordarkirina zimanê dayikê ye û wiha got:
"Kurd nikarin bi azadî zimanê xwe di perwerde û qada giştî de bi kar bînin.
Astengiyên li pêşiya perwerdehiya bi zimanê dayikê li dibistanan berdewam dikin.
Ev yek ji aliyê maf û azadiyên bingehîn ve pirsgirêkeke cidî ye."
Neşmîl Qasimlo bal kişand ser binpêkirinên mafên mirovan ên ku li girtîgehan tên kirin û paşxistina berdana girtiyan wekî "îşkenceya derûnî" bi nav kir.
"Dikare ji bo Tirkiyê bibe destkeftiyeke mezin"
Neşmîl Qasimlo destnîşan kir ku pergala demokratîk a li Rojavayê Kurdistanê hatiye avakirin, ezmûneke girîng pêşkêş dike û got:
"Li Rojava pergaleke demokratîk heye. Ji bo Kurdên li Tirkiyê jî derfetên demokratîkbûnê yên zêdetir derdikevin holê.
Ez Pêvajoya Aştî û Civaka Demokratîk a ku dest pê kiriye pir baş û erênî dibînim.
Ger pirsgirêka Kurd çareser bibe, dikare ji bo Tirkiyê jî bibe destkeftiyeke mezin.
Divê mafên Kurdan di destûra bingehîn de werin pejirandin, da ku Kurd xwe rehet hîs bikin."
Neşmîl Qasimlo: Ev pêvajo dê bi ser bikeve
Neşmîl Qasimlo bilêv kir ku Kurd êdî ji têkoşîna xwe ya ji bo mafên xwe paşve gav navêjin û wiha got:
"Ez bawer dikim ku pêvajo dê bi ser bikeve.
Ji ber ku Kurd êdî dest jê bernadin. Ne hewce ye ku li benda dewletê bimînin.
Her gavek ku hûn diavêjin rastiyekê diafirîne û ev yek mezin dibe.
Mînak, heke ji bo Diyarbekirê navê Amedê bê gotin, ew dê bibe rastiyek.
An jî heke hemû Kurd dest bi axaftina bi Kurdî bikin û zarok li dibistanan bi zimanê xwe yê dayikê biaxivin, kes nikare wê berevajî bike."
Neşmîl Qasimlo: Danîna çekan ne qelsî ye
Neşmîl Qasimlo anî ziman ku ramanên Ocalan bandorê li ser civaka Kurd dikin û got:
"Min Abdullah Ocalan rû bi rû nedîtiye. Lê min pirtûkên wî xwendine û ez îdeolojiya wî dizanim.
Ez danîna çekan ji aliyê PKK'ê ve wekî pêşveçûneke erênî dibînim. Ji ber vê yekê, maf li aliyê Kurdan e.
Ger Abdullah Ocalan azadiya xwe ya fizîkî bi dest bixe, pêvajo dê pir çêtir bimeşe.
Danîna çekan ne qelsî ye, tê wateya hêzê."
Neşmîl Qasimlo destnîşan kir ku Tirkiye û Rojhilata Navîn li benda encamên Pêvajoya Aştî û Civaka Demokratîk in û got ku Kurdan rêya xwe diyar kiriye.
Neşmîl Qasimlo destnîşan kir ku, pêvajoya ku tê meşandin tenê dê di Tirkiyê de sînordar nemîne û got ku dê di warê aştiya Rojhilata Navîn de jî encamên girîng bide der.
