Li gorî agahiyên ji çavkaniyên leşkerî hatine girtin, Rûsyayê di vê êrişê de nêzî 6 moşekên dijî-keştiyan yên bi navê "Zîrkon" ku hatine guhertin, bi kar anîne. Serokê Şaredariya Kîvê Vitali Klitschko ragihand ku di encama bombebaranê de ziyan gihîştiye avahiyên îdarî, depo û avahiyên niştecîhbûnê. Her wiha hat diyarkirin ku li hinek herêmên rojhilatê Çemê Dnîpro niştecih bê av mane. Hêzên Hewayî yên Ukraynayê jî da zanîn ku bajarên Dnîpro û Zaporîjya yên li başûrê welat bûne armanca moşekên balîstîk.
Ji aliyê din ve, Ukraynayê jî bi dronan êrişî hinek armancên li nava axa Rûsyayê kir. Di nav armancan de bajarê Rostov li başûrê Rûsyayê û bajarê Yaroslavl li bakurê rojhilatê Moskowê hebûn. Ji ber van êrişan, Saziya Firokvaniyê ya Rûsyayê "Rosaviatsia" neçar ma ku qedexeyên demkî deyne ser çend balafirgehan.
