Serokê Amerîkayê Donald Trump li bajarê Dallasê di konferansa Partiya Komarparêz a ji bo hilbijartinên nûkirina nîvî de axivî. Ev gotar di demekê de hat ku li başûrê Îranê, bi taybetî li nêzî Tengava Hurmuzê û Girava Qeşmê, dengê teqînên mezin hatibû bihîstin. CENTCOM'ê ragihandibû ku wan wekî bersiv 5 keştiyên petrolê yên Îranê jinav birine.
Trump di gotara xwe de bi eşkereyî diyar kir ku dibe ku Amerîka careke din rasterast leşkerî li Îranê bixe û bi taybetî xala stratîjîk a bi navê "Çiyayê Qazmê" (Çiyayê Fasê) wekî armanc nîşan da. Wî destnîşan kir ku ew ê tu carî nehêlin Tehran bibe xwediyê çekên nukleerî û îdîa kir ku hêzên Amerîkayê niha bi tevahî kontrola Tengava Hurmuzê dikin. Ji ber vê yekê, Trump pêşniyar kir ku navê vê tengava avê ya navdewletî were guhertin û jê re "Tengava Trump" were gotin.
Serokê Amerîkayê da zanîn ku ev şerê bi Îranê re dê di cih de bi dawî bibe piştî ku ew di hilbijartinên pêş de serkeftinê bi dest bixin. Wî her wiha anî ziman ku ew niha ne li pey peymaneke wekî ya nukleerî ya berê ne, lê planên wî ji wê mezintir in û dergehê danûstandinan tenê di bin mercên Washingtonê de vekirî ye. Trump bal kişand ser parastina berjewendiyên aborî û enerjiyê yên Amerîkayê li herêmê, ku ev yek rasterast bi rawestandina firotina petrola Îranê ve girêdayî ye.
Her çend Trump di gotara xwe de peyamên gelekî geş û serkeftinên bilez dida nîşandan, lê raporên rojnameya Wall Street Journal nîşan didin ku di nav rêveberiya wî de nêrînên cuda hene. Cîgirê Serok J.D. Vance û Wezîrê Derve Marco Rubio di civînên girtî de hişyarî dane Trump ku berxwedana Tehranê dikare bibe sedem ku ev aloziya leşkerî heta dawiya dema serokatiya wî dirêj bike.
