Ji dema êrîşa 2019’an a Tirkiyê li ser Serê Kaniyê û qutkirina stasyona Elokê ve, ava vexwarinê li ser zêdetirî mîlyonek kes li bajarê Hesekê hatiye qutkirin.
Ji wê demê ve, av bi temamî li ser Hesekê û gundewarên wê qut bûye.
Mafê sivîlan ji ava têrker û ewle bêpar hatiye hiştin.
Vê yekê barê welatiyan giran kiriye û encamên wê yên karesatbar bandoreke neyînî li ser jiyana welatiyan û ekolojiya herêmê kiriye.
Li bajarê Hesekê û gundewarên wê hîna jî krîza avê nehatiye çareserkirin.
Hewldan hebûn ku bîr werin kolandin, lê ava bîran bi giştî şor e û gelek kils tê de heye.
Der barê mijarê de, Ebdulbaqî Ebdo welatiyê ji Hesekê diyar kir ku bi hatina havînê re, ew gelek zehmetiyan dikşînin û ev av gelek nexweşiyan bi xwe re tîne.
Ji ber qutkirina ava stasyona Elokê li ser bajarê Hesekê, şêniyên Hesekê û gundewarên wê bi rêya tankên avê pêdiviyên xwe yên avê pêk tînin.
Ava van tankan ji bo vexwarinê ne guncav e û dibe sedema belavbûna nexweşiyan.
Emar Silêman jî, yek ji welatiyên Hesekê got ku ew 10 bermîl av bi 70-80 hezar lîreyên Sûrî dikirin û daxwaz kir ku di demeke nêz de pirsgirêka avê çareser bibe.
Yekane stasyona ku avê dide Hesekê Elok e
Stasyona Elokê li gundê Elokê yê rojhilatê Serê Kaniyê ye. Ev stasyona yekan e ya ku avê dide Hesekê û navçeyên wê.
Sedemên aloziya avê vedigerin dawiya 2019’an dema ku Serê Kaniyê hat dagirkirin û stasyona Elokê hat rawestandin.
