Li Başûrê Kurdistanê xebatên ji nû ve dîzaynkirina Pêşmergeyan berdewam dikin.
Rêveberê Agahdarî û Hişyariyê li Wezareta Pêşmerge Osman Mihamed, ji ragihandina Başûrê Kurdistanê re derbarê pêvajoya yekbûn û reformê ya hêzên Pêşmerge daxuyanî da.
Osman Mihamed diyar kir ku avahiya leşkerî ya kevin bi sîstemeke fermandariya herêmî ya modern hatiye guhertin û ev hûrgilî parve kirin:
"Avahiya yekîneyên kevin ên 70 û 80 bi awayekî radîkal hatiye guhertin û veguheriye fermandariyên herêmî.
Fermandariya Herêmî ya 1emîn pêvajoya yekbûnê bi hemû beş û tugayên xwe temam kiriye.
Di Fermandariya Herêmî ya 2yemîn de, tenê hin erkên îdarî mane û em pêşbînî dikin ku ev pêvajo heta dawiya Îlonê biqede.
Di qonaxa dawî de, Herêma Kurdistanê wê bibe xwedî hêzeke leşkerî ya yekgirtî.
Ev hêz bi tevahî ji 11 beş û tugayên piyade pêk tê, ku 6 beş li Herêma 1emîn û 5 beş li Herêma 2yemîn in."
Mihamed serkeftina projeyê bi helwesta domdar a Serokwezîr Mesrûr Barzanî ya di pênc salên borî de girêda û wiha got:
"Bi saya talîmatên rasterast ên hikûmetê û israra Serokwezîr, me di dîroka Pêşmergeyan de serdemeke nû vekir."
Her wiha Rêveberê Agahdarî û Hişyariyê da zanîn ku sîstema darayî ya hêzên Pêşmerge niha bi tevahî şefaf bûye.
Osman Mihamed rave kir ku %97ê personelên Pêşmerge niha di çarçoveya projeya "Hesabê Min" de mûçeyên xwe bi rêya bankayan werdigirin û %3ê mayî jî dê di demek nêzîk de di nav pergalê de cih bigirin.
Muhammed: Bexda berpirsiyariyên xwe yên destûrî û yasayî bicîh nayne
Osman Mihamed rexne li nêzîkatiya hikûmeta Îraqê ya li hember Pêşmerge kir û tekez kir ku Bexda berpirsiyariyên xwe yên destûrî û yasayî bicîh nayne.
Mihamed wiha bidawî kir:
"Hikûmeta Îraqê di derbarê budçe û çekên Pêşmerge de xemsar e.
Heta niha, ji Wezareta Parastinê ya Îraqê ti piştgiriya budçe an lojîstîkî li ser navê Pêşmerge nehatiye wergirtin."
