Desteya Tenduristiyê ya Kantona Cizîrê, Nexweşxaneya Gel ku berê wek Nexweşxaneya Neteweyî dihat nasîn, piştî nûjenkirin û sererastkirinê, ji nû ve vekir.
Nûnerên Rêveberiya Xweser, meclis û saziyên kantonê, Meclisa Rûspiyan, bijîşk û nûnerên civakên cuda yên li Qamişloyê di merasîma vekirinê de amade bûn.
Nexweşxaneya li Qamişlo ji 12 beşan pêk tê
Di nava nexweşxaneyê de 12 beş hene weke; nexweşiyên hundirîn, lênihêrîna awarte, şewat, nexweşiyên hestiyan, gurçik, guh, neştergerî, nexweşiyên jinan û zayînê, beşa alîkariya lezgîn, laboratuar û radyolojî. Her wiha 10 klînîk li nexweşxaneyê hene.
Desteya Tenduristiyê 60 bijîşkên pispor û 60 bijîşkên giştî, her wiha 250 karmendên hemşîretî û îdarî erkdar kirine.
Di nexweşxaneyê de 220 text û 5 ambulans hene
Li nexweşxaneyê 220 text, 5 ambulans û dermanxaneyek jî hene.
Hemû xizmetên li nexweşxaneyê dê bê pere bên dayîn, ji bilî tomografî (CT) û Wêneya rezonansê ya magnetîkî (MR) ku dê bi buhayekî erzan bên pêkanîn.
Desteya Tenduristiyê ya Rêveberiya Xweser Nexweşxaneyê birêve dibe
Di merasîma vekirina nexweşxaneyê de, Hevserokê Meclisa Rêveber a Rêveberiya Xweser a Demokratîk a Kantona Cizîrê Hesen Şero axivî û diyar kir ku Rêveberiya Xweser bi hemû hêza xwe, bê westan ji bo civakê têdikoşe.
Dr. Ciwan Hemê: Em ê layiqî fedakariyên şehîdan bin
Rêveberê giştî yê nexweşxaneyê Dr. Ciwan Hemê jî axivî û spasiya wan kesan kir ên ku beşdarî vekirina nexweşxaneyê bûn û got ku ji bo ew layiqî fedakariyên şehîdan bin wê bi fedakariyeke mezin xizmeta gel bikin.
Piştî axaftinan, nexweşxane ji aliyê malbatên şehîdan ve hat vekirin.
