Tevî ku agirbest ji alîyê Serokê Amerîkayê ve hat dirêjkirin jî, şerê di navbera Îsraîl û Hizbullahê de didome.
Wezareta Tendirustiyê ya Libnanê ragihand ku di du êrîşên asmanî yên Îsraîlê yên li ser kamyonek û motorsîkletê li bajarokê Yehmor Şeqîf, li navçeya Nebatiye, de 4 welatiyên Libnanê mirine.
Her wiha duh jî li Libnanê, di êrîşên hewayî yên Îsraîlê de, 6 kes hatibûn kuştin û 2 kes jî birîndar bibûn.
Wezareta Tendirustiyê ya Libnanê ragihand ku duh li başûrê welêt, li Geliyê Hujeyr di êrîşên hewayî yên Îsraîlê de du kes hatine kuştin.
Tevî agirbestê jî pevçûnên li Libnanê didomin
Hizbullahê duh ragihand ku wan dronek xistiye xwarê, û îdia kir ku ya Îsraîlê ye.
Siyasetmedarekî Libnanî yê Hizbullahê Elî Feyad, di daxuyaniyekê de derbarê dirêjkirina agirbestê de wiha got:
"Ji ber israra Îsraîlê di kiryarên dijminane de, di nav de kuştin, bombebaran, êrîşên çekdarî, wêrankirina gund û bajarokên Başûrê Libnanê, pir girîng e ku were gotin ku agirbest bê wate ye."
Li alîyekî din artêşa Îsraîlê got ku wan şeva borî sê roketên Hizbullah li başûrê Libnanê kirin hedef.
Her wiha artêşa Îsraîlê, da zanîn ku wan hejmareke şervanên Hizbullahê di êrîşên asmanî yên cuda de kirin hedef.
Artêşa Îsraîlê diyar kir ku wan cihên ku ji hêla Hêza Ridwan a Hizbullahê ve li başûrê Libnanê têne bikaranîn, kirin hedef.
