Di nav du salên borî de, li Başûrê Kurdistanê rêjeya jinên ku beşdarî rêveberiya bajar û bajarokan dibin û erkên rêveberiyê digirin, zêde bûye.
Çira Ehmed Letîf, nişteciha parêzgeha Silêmaniyê ye, îro bi fermî wek wekîla Seroka Dadgeha Hêzên Ewlekariya Navxweyî dest bi kar kir.
Wezareta Navxwe ya Hikûmeta Herêma Kurdistanê ev biryar wekî beşek ji pêşxistina şiyan û rola jinan pênase kir.
Ev tayînkirin di demekê de tê ku jinên Kurd tevî astengiyên cûr be cûr jî, ji bo bidestxistina peywirên bilind têdikoşin.
Bi ezmûna xwe ya qanûnî di Wezareta Navxwe ya Başûrê Kurdistanê de, efser Çira Ehmed Letîf karî vê peywira hesas bi dest bixe, ku berê tenê ji hêla mêran ve dihat birêvebirin.
Ev gava nû di nav dezgehên ewlehiyê de wekî xaleke werçerxê ya nû di dîroka dadweriya leşkerî li Başûrê Kurdistanê de tê hesibandin.
Hêjayî bibîrxistinê ye ku li Başûrê Kurdistanê berê, piraniya meqamên bilind di dadgehên leşkerî û hêzên ewlehiyê de ji hêla mêran ve dihatin girtin.
Lêbelê, zextên sivîl û guhertina perspektîfa sazûmanî, rê li ber jinan vekiriye ku di astên herî bilind ên biryardayînê de derkevin û jêhatîbûna xwe ya zagonî di vî warî de îsbat bikin.
