Desteya Hewavaniyê ya Erebistana Siûdiyê daxuyand ku du balafirgehên wan di navxweyê welat de bûne armanc, ku ev yek nîşana zêdebûna aloziyên leşkerî yên li gel Hûsiyan e. Tevî ku Wezîrê Enerjiyê yê Erebistana Siûdiyê Ebdulezîz Bîn Selman ragihand ku kapasiteya veguhastina petrolê di xeta "Rojhilat - Rojava" de gihîştiye 5,8 milyon bermîlan, metirsiyên li ser astengbûna dabînkirina sotemeniyê nehatin kêmkirin.
Şirovekarên aboriyê wek Naeem Aslam û Samer Hesen didin zanîn ku bihayê petrolê di navbera baştirbûna dabînkirina fîzîkî û rîskên jeopolîtîk de asê maye. Ew balê dikişînin ser şiyana Hûsiyan a ji bo armanckirina xalên stratejîk ên bi sedan kîlometreyan dûrî sînor, ku ev yek metirsiyên rawestana hinartina petrolê ya ji Rojhilata Navîn bilind dihêle.
