Siyasetmedara Kurd Leyla Zana ji ber kuştina 6 Pêşmergeyan û birîndarbûna 30 Pêşmergeyên din di êrîşên mûşekî yên Îranê de, sersaxî da Mesrûr Barzanî.
Li gorî daxuyaniya Hikûmeta Başûrê Kurdistanê, Leyla Zana di der barê mijarê de ev peyam da:
"Me bi xembariyeke mezin xebera şehîdketina 6 Pêşmergeyên qehreman û birîndarbûna 30 Pêşmergeyên din bihîst.
Ev xemeke mezin e, ne tenê ji bo malbatên wan, di heman demê de ji bo hemû gelê me ye."
Her wiha Leyla Zana sersaxî û hevsoziya xwe ya ji bo malbatên Pêşmergeyan, Mesrûr Barzanî û hemû Pêşmergeyan anî zimên.
Siyasetmedara Kurd ji bo birîndaran daxwaza şîfaya bilez kir û destnîşan kir ku bîranîna Pêşmergeyên ku hatine kuştin wê di dilê gel de her tim bijî û rêya wan dê bidome.
Serokwezîrê Herêma Kurdistanê Mesrûr Barzanî ji bo vê hevsoziyê spasiya Leyla Zana kir.
Mesrûr Barzanî di dawiyê de wiha got:
"Şehîd her tim di dilê gelê Kurdistanê de zindî ne.
Rêya wan didome û serkeftin wê her tim a gelê Kurdistanê be."
