Platforma Ked û Demokrasiyê ya Dîlokê di derbarê Serokê Giştî yê Sendîkaya Karkerên Tekstîl Raçandin û Çerm ên Yekbûyî (BÎRTEK-SEN) Mehmet Turkmen de, ku ji ber piştgiriya karkerên ku li kargeha Sirma Haliyê ya li Herêma Pîşesaziya Rêxistinkirî ya Başpinarê (OSB) berxwedanê dikirin hatibû girtin, civînek çapemeniyê li dar xist.
Civîna çapemeniyê duh êvarê li Qada Balikli ya navçeya Şahînbey a Dîlokê hat lidarxistin û nûnerên sendîkayên pêkhateyên platformê, partiyên siyasî û gelek welatî beşdar bûn.
Daxuyaniya çapemeniyê li ser navê platformê ji hêla Serokê Giştî yê Haber-Senê Mesut Balcan ve hat xwendin.
Balcan, bi bîr xist ku karkerên kargeha Sirma Haliyê ya li Herêma Pîşesaziya Rêxistinkirî ya Başpinarê hefteyek e ji ber mûçeyên nehatine dayîn û mafên hatine dizîn, li ber xwe didin û tekez kir ku hikûmet û dadgerî ne li aliyê karker, li aliyê karsaz in.
Balcan di daxuyaniyê de wiha got:
"Dema ku karker ji ber mûçeyên nehatine dayîn, zêdekirina mûçeyê ya nehatî girtin û mûçeyên zêde yên hatine dizîn, ji bo mafên xwe yên herî bingehîn têdikoşin, li şûna çareseriyê bi polîtîkayên zext û cezakirinê re rû bi rû dimînin.
Mehmet Turkmen piştî ku ji ber axaftina li ser van daxwazên adil ên karkeran serdegirtin li mala wî hate kirin, hate binçavkirin û îro bi awayekî neqanûnî hate girtin."
Sevda Karaca Demîr: Derewan li me nekin
Parlamentera Dîlokê ya ji Partiya Kedê (EMEP) Sevda Karaca Demîr di civîna çapemeniyê de bal kişand ser îstismar û bêqanûniya li bajêr. Sevda Karaca Demîr got:
"Li vî bajarî, di hefteyekê de, ji ber çavbirçîtiya karsazan ji bo qezencê 3 karker birîndar bûn û 2 karker jiyana xwe ji dest dan.
Ev tenê yên ku em dizanin in; yên ku hatine veşartin jî hene.
Ger hûn her tiştê pêwîst dikin, çima dadgeh bi dosyayên karkerên ku 10 sal in mafên xwe negirtine tije ne? Derewan li me nekin."
Mehmet Turkmen duh (16'ê Adarê) bi îdiaya "dijminatiyê di nava gel de çêdike" hatibû girtin.
