Bi dirûşmeya "Bi hevgirtina jinan em ê Sûriyeke azad, demokratîk û nenavendî ava bikin" Kongra Star û Kombûna jinan a Zenûbiya kampaniyaya Avakirina Sûriyeya Azad û Demokratîk ragihandin.
Daxuyanî bi boneya salvegera 6`mîn a şehadeta Sekretera Giştî ya Partiya Sûriya Pêşerojê, Hevrîn Xelef Li bajarên Reqa û Qamişloyê ve hat xwendin.
"Bê azadiya jinan û beşdariya wan a çalak demokrasî pêk nayê"
Di daxuyaniyê de hate diyarkirin ku ji bo wefadariya giyanê şehîd Hevrîn Xelef, bi îradeya xwe ya azad wateya pêşengtiya jin a berpirsiyar temsîl kir, bawer dikir ku bê azadiya jinan û beşdariya wan a çalak demokrasî pêk nayê.
Kombûnê armanca Kampanyayê bi van xalan parvekir:
-Yekirina rêzên jinên Sûrî ji paşxaneyên cûda ji bo avakirina hevgirtineke jinan a neteweyî ya berfireh ku bikaribe bandorê li pêşeroja welêt bike.
- Têkoşîna ji bo destûreke demokratîk ku wekheviya zayendî ya tevahî garantî dike û mafên siyasî, aborî û civakî yên jinan diparêze.
- Parastina destkeftiyên jinan li Bakur û Rojhilatê Sûriyê wekî destkeftiyeke neteweyî ya hemû Sûriyan û hwd.
Kampanya dê ji 12ê Cotmehê heta 12ê Mijdara 2025an bidome û dê di sê qonaxan re derbas bibe.
Di qonaxa yekem de kampanya dê ji bajarên Qamişlo û Reqayê were destpêkirin û bangek vekirî dê ji jinên Sûriyê û cîhanê re were kirin da ku helwesta xwe li dora daxwazên jinên Sûriyê bikin yek.
Her wiha di qonaxa duyem de rêxistinkirina rêzeçalakiyan, di nav de:
- Peyamên hevgirtinê yên navneteweyî ji tevgerên jinan ên li çaraliyê cîhanê, ku ji bo piştgiriya jinên Sûriyê têne belavkirin.
- Rastiya Sûriyê û daxwazên jin û pêkhateyên wê yên cûda.
- Têgeha xweparastina jin ji perspektîfeke Jinelojî û ezmûna Yekîneyên Parastina Jinan (YPJ).
- Ezmûna avakirina civakeke demokratîk li Bakur û Rojhilatê Sûriyeyê wekî modelek azadiyê.
- Ezmûnên jinan li Filistîn, Belûçistan, Hindistan û Amerîkaya Latîn di têkoşîna azadî û aştiyê de.
Di qonaxa sêyem de kampanya dê bi pêşkêşkirineke berfireh a hemî materyalên hilberandî (vîdyo, daxuyanî, wêne, gotar, hwd.) bi dawî bibe û ji rêxistinên navneteweyî, parlemento, ajansên Neteweyên Yekbûyî û rêxistinên mafên mirovan re were şandin.
