Jinên Şengalê rastî ferman û êşkenceyên giran hatin, lewma ew xwe bi rêxistin û hêz dikin.
Di bin diruşmeya ‘Bi rêxistin û têkoşînê em ê bibin pêşengên civaka demokratîk û azad’ de, Komxebata Ronesansa Jinên Êzidî hat lidarxistin û nêzî du sed jinên Êzidî û Ereb beşdarî vê komxebatê bûn.
Komxebat ji aliyê Tevgera Azadiya Jinên Êzidî (TAJÊ) hat lidarxistin û bi deqeyeke rêzgirtin destpêkir
Sûham Şengalî: Em azadiya Rêber Apo, weke azadiya xwe dibînin
Berdevka Dîplomasiyê ya TAJÊ Sûham Şengalî, peyama Rêber Apo da û got: “Rêber Apo bareke giran û pêşengî daye jinên Êzidî, lewma em dixwazin bi Rêber Apo re diyalogên azad pêşbixin û bijîn.”
Sûham Şengalî destnîşan kir ku ew azadiya Rêber APO, weke azadiya xwe dibînin.
Şengalî balkişand ku Rêber Apo di peyama xwe de gotibû "aştî û civaka demokratîk’ wê herî zêde ji bo Êzidiyan bibe ronesans."
Berdevka TAJÊ qurbaniyên fermanê û berxwedana Şengalê bi bîr anî û diyar kir ku bi saya fikir û felsefeya Rêber Apo, gelek guhertinên mezin çêdibin.
Sûham Şengalî behsa girîngiya azadiya fizîkî ya Rêber Apo kir û beweriya xwe anî ziman ku di vê komxebatê de, wê nîqaşên girîng bimeşînin, pêşengiyê ji hemû gelên Rojhilata Navîn re bikin û jin wê pêşengiyê ji guhertinên civakî re bikin.
Şengalî di dawiya axaftina xwe de, komxebat li Rêber Apo û jinan pîroz kir.
Peyama Rêber APO wek sînevîzyon hat temaşekirin
Piştî axaftinan peyama Rêber APO ya ji bo Êzidiyan bi şêwazê sînevîzyon hat temaşekirin.
Di komxebatê de 3 semîner wê werin dayîn
Di komxebatê de wê sê semînerên bi ser navê `sosyolojiya jinên Êzidî, bandora fermanan li ser jinên Êzidî, di ronesansa civaka Êzidî de rola jinên Êzidî` werin dayîn.
Di heman demê de, wê peyamên ku ji derveyî Şengalê hatine jî, werin xwendin û temaşekirin.