Li Îndoneziyayê karesata deryayî ya ku di nîvê vê mehê de qewimîbû, girantir dibe. Karbidestên deryayî îro eşkere kirin ku hejmara kesên jiyana xwe ji dest dane gihîştiye 66 kesan, dema ku tîmên rizgarkirinê di roja 16'an a xebatên lêgerînê de hîn jî li 69 rêwiyên windabûyî digerin.
Keştiya bi navê "Virgo Transport 8", ku 243 kes tê de bûn di nav wan de 30 endamên tîma keştiyê û hejmareke nediyar a wesayîtan hebûn di saetên serê sibê yên 13'ê Îlonê de ji ber mercên nebaş ên hewayî wergeriyabû.
Ev rûdan di dema geşta keştiyê ya ji bajarê Surabaya yê ber bi bajarê Banjarmasin ê Kalimantan ve pêk hatibû.
Hardiantiya Putra, yek ji berpirsên paybilind ên ajansa rizgarkirinê ya welat, destnîşan kir ku xebatên wan di nava kavilên keştiyê de berdewam dikin û armanca serekî ya xebatên îro dîtina rêwiyên asêmayî yên di nava kabîneyan de ye. Li gorî amarên dawî yên ajansê, heta niha tenê 108 kes hatine rizgarkirin û xebatên ji bo kesên winda di bin metirsiyên hilweşîna hilanîna keştiyê de didomin.
Welatê Îndoneziyayê ji ber erzanbûn û hêsaniya geşta deryayî gelekî xwe dispêre van keştiyan ji bo çûnûhatina di navbera 17 hezar giravên xwe de, lê ji ber kêmasiyên ewlehiyê rûdanên bi vî rengî gelek caran diqewimin.
