Li daristanên bêdeng ên Hindistanê şahidên dîrokek veşartî hene, ew jî jin in.
Bi salane li daristan, gundên xizan û herêmên jibîrkirî yên Hindistanê têkoşînek tê meşandin. Navê vê têkoşînê tevgera Maoîst- an jî weke ku dewlet dibêje Naxalite.
Jinên ku di vê têkoşînê de cih girtine ne tenê gerîlayên ku çek hildigirin, di heman demê de bûne mamoste, rêxistinvan, hemşîre, hevrê û rewşenbîr jî.
Hin ji wan jinan mîna Anuradha Ghandy hewl da ku Marksîzmê û femînîzmê bi hev re bike yek.
Hinek fermandarên yekîneyên çekdar ên wek Narmada Akka û gelek jinên din jî, di kûrahiya daristanê de bêyî ku navê wan were tomarkirin, jiyana xwe ji dest dane.
Jinên di şoreşa Hindistanê de nedîtbar in
Ev jin nedîtbar in, ji ber ku navên wan li ber çavê dewletê neqanûnî ne, têne sansurkirin.
Her wiha çîrokên wan ji ber ku li ber çavê civakê jin in, tên biçûk xistin.
Medyayên Hikumeta Hindistanê ew jin tenê weke çekdarên mirî ragihandin, nepirsîn ku ew kî ne û çima rêyek wisa hilbijartine.
Lê belê, çîroka her yek ji wan qala neheqiya ku ji hêla pergala kastê ve hatî pêkanîn û îstîsmara ku jin pê re rû bi rû dimînin vedibêje.
Bi çekên di destên xwe de dengên xwe yên bi salan dihatin qutkirin dan bihîstin. Lê mixabin, pirtûkên dîrokê dîsa dengê wan qut kirin.
Naxalîtî endamên herî xizan ên civaka Hindistanê temsîl dikin
Tevgera Maoîst an jî Naxalîzm, têgeheke giştî ye ku ji bo gelek komên çekdar ên serhildêr û cudaxwaz ên Maoîst tê bikaranîn ku ji nîvê salên 1960'î û vir ve li Hindistanê bi navber xebitîne.
Navê Naxalîtî ji bajarokê Naxalbarî yê li bakurê dûr ê eyaleta Bengalaya Rojava li bakurê rojhilatê Hindistanê tê, ku di sala 1967'an de, navenda serhildana cotkarên eşîrî li dijî axayên herêmî bû.
Grûpên Naxalîtî bi gelemperî endamên herî xizan û civakî yên herî marjînalîzekirî yên civaka Hindistanê temsîl dikin.
Bi deh salan e, wan li dijî hedefên wekî xwediyên milkê, karsaz, siyasetmedar û hêzên ewlehiyê şerekî gerîla dane meşandin.
Komên Naxalî gelek caran fonksiyonên rêveberiyê girtine ser xwe û xizmetên civakî li deverên di bin kontrola xwe de peyda kirine.
