Ji dema Baasê heta Hikûmeta Veguhêz hewldanên guhertina navên Kurdî

Rêjîma Baasê di salên 50’î de dest bi navkirina bajaran bi Zimanê Erebî kirin. Di salên 60`î û 70`yê de bi taybetî piştî bicihanîna Kembera Erebî di sala 1973`an de  dest bi erebkirina gund û bajarên Parêzgeha Hesekê kirin. Weke Qamişlo bû Qamişlî, Tirbespiyê bû Qehtaniyê, Çilaxa bû Cewadiyê, Dêrik kirin Malkiyê û Kobanê kirin Eyn Ereb hwd…

 Piştî Peymana 29`ê çileyê ya di navbera Serokkomarê Hikûmeta Vegûhêz a Sûriyê  Ehmed Şera û Fermandarê Giştî yê Hêzên Sûriya Demokratîk hat îmzekirin. Ehmed Şera bi biryarnamekê de dibêje Kurd pêkhateyeke resene li Sûriyê, Zimanê Kurdî zimanekî niştîmanî yê Sûriyê û di kare di hemû saziyan de were karanîn.

Ji koşka dadweriyê heta navê Kobanê pirsgirêka navê Kurdî   

Aloziya li ser Zimanê Kurdî ji Koşka Dadweriyê ya li Bajarê Hesekê destpêkir.  Destpêkê li ser koşka dadweriyê bi zimanê Kurdî û Erebî hat nivîsandin, piştî wê ew tablo bi zimanê Erebî Înglîzî hat guhertin. Ev yek ji aliyê Xelkên bajarê Hesekê ve rastî nerazîbûnên tund hatin û rojane çalakî li pêşiya Koşka dadweriyê dihat kirin.  Ne nivîsandina bi zimanê Kurdî li kêleka Zimanê Erebî di saziyên dewletê de dibe cihê nerazîbûnê. Ji bo xwedîderketina li navê Kobanê û fermîkirina navê wê di hemû saziyên fermî de, pêngava "Kobanê nasnameya me ye" destpêkir. 

Xelkên kobanê: Em ê ti carî qebûl nekin Kobanî bibe 'Eyn Ereb'

Xelkên bajarê Kobanê gotin ku ew ê ti carî qebûl nekin navê Kobaniyê bê guhertin û bibe Eyn El-Ereb. Xelkê Kobanê bang li tevahî hêzên civakî, çandî , hiqûqî û welatiyên Sûriyê kirin ku rêzê ji nasnameya Kobanê re bigirin. Ji bo navê Kobanê xelkên herêma Cizîrê jî daketin qadan û gotin ku Kobanê ne tenê navekî demkî ye, ew nasnameyeke bi xwînê hatiye nivîsandin e û hêjayî ku di belgeyên fermî de cih bigire.

Navê Kurdî yê çilaxa careke din li ser lewheyê hate nivîsandin

Hefteya borî di çarçoveya pêvajoya entegrasyonê de, Postexaneya Çilaxa hat vekirin. Lê li şûna ku navê kurdî "Çilaxa" li ser tabeleya hatiba nivîsandin, navê erebkirinê "Cewadiyê" hatibû nivîsandin.  Şêniyên bajar ku li hemberî vê yekê bi xwepêşandadan nerazîbûna xwe  nîşan da û bangên sererastkirinê kirin. Li ser vê yekê Gerînendetiya Postexaneyê navê Çilaxa bi zimanê kurdî li ser tabelayê nivîsand. Li Rojavayê Kurdistanê navê gund û bajarên Kurdan yên resen ji aliyê hikûmeta hilweşiyayî ya Bassê ve ne dihat qebûl kirin, niha Hikûmeta Veguhêz a Sûriyê hewil dide heman navê ku Rêjîma Baas`ê li bajarên Kurdan kiribû dîsa vegerîne. Lê ev yek ji aliyê Xelkên Rojavayê Kurdistanê ve nayê qebûlkirin.