Nû: Nivîsgeha Serokwezîrê Îsraîlê Benyamîn Netanyahu duh di daxuyaniyekê de, ragihand ku Îsraîlê tabûteke ku cenazeyê dîlekî tê de ye ji Xezeyê wergirtiye.
Cenazeya ku hatiye radstkirin ,ew ê li Enstîtuya Neteweyî ya Tiba Edlî ya li Tel Avîvê were naskirin.
Ji aliyê xwe ve, Hemasê piştrast kir ku cenaze radestî Xaça Sor hatiye kirin û berdevkê wê Hazim Qasim, di daxuyaniyekê de got ku tevger wê ji bo temamkirina pêvajoya dan û standinê xebata xwe bidomîne.
Hemasê berê termên 9 ji 28 dîlên mirî yên ku li Xezeyê hatine girtin, radestî Îsraîlê kiribû.
Hemas: Em ji bo agirbesteke 3 heya 5 salan amade ne
Endamê buroya siyasî ya Hemasê Mihemed Nazzal jî di hevpeyvînekê de ji Reutersê re, got ku tevger ji bo ji nû ve avakirina Xezeyê ji bo agirbesteke 3 heta 5 salan amade ye.
Nazzal rave kir ku armanca agirbestê ne amadekirina şerekî nû ye, lê dayîna asû û hêviyeke rastîn ji Filistîniyan re ye.
Di bersiva gotinên Nazzal de, Ofîsa Serokwezîrê Îsraîlê diyar kir ku Îsraîl pabendî peymana agirbestê ye .
Daxuyaniya Îsraîlê wiha bû: "Hemas dizane cenazeyên dîlên me li ku ne û peyman zelal e, dem diqede divê Hemas çek deyne û ew pabendî plana 20 xalan bibe."
Îsraîl agirbestê binpê dike: Li Xezeyê 11 kes hatin kuştin
Li gorî Ajansa Nûçeyan a Filistînê (WAFA), li Xezeyê di topbarana Îsraîlê de ku wesayîtek li taxa Zeytûnê ya rojhilatê Xezeyê hedef girt, 11 kes hatin kuştin û yên din jî birîndar bûn.
Hemasê ev êrîş şermezar kir û tekez kir ku ev sûc, binpêkirinên berdewam ên agirbestê nîşan dide.
`Ji dema agirbest ketiye meriyetê ve 23 welatiyên Filistînî hatine kuştin`
Dîsa Wezareta Tenduristiyê ya Xezeyê, di rapora xwe ya rojane de, diyar kir ku hejmara kuştiyan berdewam zêde dibe û ragihand ku ji dema agirbest ketiye meriyetê ve, 23 kes hatine kuştin û 122 kes jî birîndar bûn.
Li Xezayê 9 sivîl hatin kuştin
Herî dawî Artêşa Îsraîlê li taxa Zeytûnê ya bajarê Xezeyê gule li otobuseke sivîlan reşand û di encamê de 9 sivîlên Filistînî jiyana xwe ji dest dan.
Ji aliyê xwe ve jî, Artêşa Îsraîlê ragihand ku ji ber otobus ji "xeta zer" a ku hatiye destnîşankirin, derbas bûye, wan gule li wê reşandine.
