Piştî ku agirbestek di navbera Îsraîl û Hizbullahê de pêk hat, Tengava Hurmizê ji aliyê Îranê ve hate vekirin.
Ev yek jî geşbîniya li ser danûstandinên di navbera Tehran û Trump de zêde dike.
Wezîrê Karên Derve yê Îranê Ebas Îraqçî li ser malpera xwe ya X'ê, ev daxuyanî da:
"Hevdemî agirbesta li Libnanê, em derbasbûna hemû keştiyên bazirganiyê ya di Tengava Humizê re ji bo dema mayî ya agirbestê bi temamî vekirî radigihînin."
Donald Turmp: Heta rêkeftinek pêk neyê wê dorpêç bidome
Serokê Amerîkayê Donald Turmp, ragihand ku Tengava Humizê bi temamî ji bo çûn û hatina bazirganiyê vekirî ye û wiha got:
"Rêya stratejîk niha "bi temamî vekirî ye û ji bo kar û derbasbûna keştiyan amade ye.
Niha Tenê benderên Îranê di bin dorpêçê de ne.
Heta rêkeftinek ji sedî sed bi îranê re pêk neyê, wê ev bender di dorpêçê de bin."
Trump, hevdem amaje pê kir ku dorpêça deryayî ya Amerîkayê "bi hemû hêz û bandora xwe" tenê derbarê Îranê de wekî xwe dimîne.
Trump, geşbîniya xwe nîşan da ku gihîştina rêkeftina dawî ya bi Tehranê re dê gelekî bi lez pêk were û got:
"Divê ev pêvajo gelekî bi lez biçe, çimkî berê li ser piraniya xalan dan û standin hatine kirin."
Qalîbaf: Ger dorpêç dewam bike, em ê careke din tengavê bigirin
Serokê Parlamentoya Îranê Mihemed Baqir Qalîbaf, bersiva gotinên Donald Trump da û wiha got:
"Serokê Amerîkayê di nava saetekê de îdiaya 7 tiştan kir ku her 7 jî derew in.
Wan bi van derewan di şer de serkeftin bi dest nexist û bê guman di dan û standinan de jî nagihêjin ti encaman."
Qalîbaf,hişyariyek da û got ku eger ev dorpêç dewam bike, wê tengav vekirî nemîne.
