Îran û Amerîkayê, derbarê xwepêşandanên li Îranê de, gefan li hevdu dixwin.
Rayedarên Îranê, bersiva hişyariya Serokê Amerîkayê Donald Trump dan û gef li berjewndiyên Amerîkayê yên li herêmê, xwarin.
Trump: Em amade ne bikevin tevgerê
Rayedarên Îranê, piştî peyama Donlad Trump a "Em amade ne bikevin tevgerê" diyar kirin ku destwerdana li karên navxweyî yên Îranê, "xeta sor" e.
Her wiha rayedarên Îranê, ragihandin ku destwerdaneke muhtemel a Amerîkayê, dê agir berde tevahiya herêmê.
Serokê Îranê Mesûd Pizişkiyan, bersiva Serokê Amerîkayê Donald Trump da û got:
"Gotinên Donald Trump, bêwate ne. Trump û hevalên wî sedema pirsgirêk û trajediyên li herêmê ne."
Her wiha Pizişkiyan idîa kir ku ti hêz nikare neteweyeke ku di rêya rastî, edalet û nêzîkatiya Îmam de dimeşe, bindest bike.
Qalîbaf: Baregehên amerîkayê hedefên meşrû ne
Serokê Parlamentoya Îranê Mihemed Baqir Qalîbaf jî bersiva Trump da û destnîşan kir ku eger li dijî Îranê "macereyek" dest pê bike, Tehran dê bersivê bide.
Mihemed Baqir Qalîbaf, gef li Trump xwar û wiha pê de çû: "Divê Trump bizanibe ku bi vê gefxwarinê, hemû navend û hêzên Amerîkayê yên li herêmê, ji aliyê me ve wekî hedefên meşrû tên dîtin."
Elî Larîcanî: Destwerdana amerîkayê dê herêmê tevlihev bike
Elî Larîcanî, Şêwirmendê Rêberê Bilind ê Îranê, Amerîka bi têkbirina aramiya herêmê tawanbar kir.
Elî Larîcanî, hişyarî da rêvebiriya Washingtonê û got: "Divê Trump bizanibe ku destwerdana Amerîkayê ya li vê mijara navxweyî, tê wateya bêîstiqrarkirina hemû herêmê û tunekirina berjewendiyên Amerîkayê.
Bila gelê Amerîkayê bizanibe ku Trump ev macera da destpêkirin."
Berdevkê Wezareta Karên Derve ya Îranê Îsmaîl Baqayî jî, bersiv da daxuyaniya Trump û wiha anî ziman: "Hewldanên Amerîkayê yên berê bes in. Îranî, dê pirsgirêkên xwe di navbera xwe de, çareser bikin û rê nadin destwerdanên derve."
Serokê Amerîkayê Donald Trump, roja înê derbarê xwepêşandanên li Îranê de, hişyarî dabû û wiha gotibû:
"Eger Îran xwepêşanderên aştîxwaz gulebaran bike û wan bikuje, Amerîka dê bi hawara wan ve biçe."
Li Îranê, ji 28'ê Kanûna 2025'an ve, xwepêşandanên gel ên li hemberî rewşa aborî û siyastên dewletê, dest pê kirine û heta niha jî didomin.
