Hunergeha Welat a Rojavayê Kurdistanê duh kîlpa xwe ya nû ya bi navê "Keynê- Dilê Bê Dil" weşand.
Stran ji aliyê stranbêj Selîmê Temo ve hatiye pêşkêşkirin.
Wekî hemû xebatên Hunergehê, di vê klîbê de jî aliyê dîtbarî, cil û bergên herêmî, û lîstikvaniya hunerî hatine hûnandin.
Keynê ne straneke nû ye, ew bi xwe folklorî ye. Xezineyeke ji çanda devkî ya herêmên Serhed û Botanê ye ku bi sedsalan e ji nifşekî derbasî nifşê din dibe.
Straneke anonîm e, wate; Kes nizane bê cara yekem ji aliyê kî ve û di kîjan salê de hatiye gotin.
Bi rêbazê hunerî, carekê Koma Welat ev stran gotiye û vê carê jî Hunergeha Welat.
Hunergeha Welat saziyeke hunerî, navendeke mûzîkê û produksiyoneke tomarkirinê ye ku li Rojavayê Kurdistanê kar dimeşîne.
Ev navend di sala 2014'an de hatiye avakirin û bi taybetî li ser vejandin, parastin û nûkirina mûzîk û çanda Kurdî kar dike.
Hunergeh stranên neteweyî, şoreşgerî û folklorî bi şêwazekî nûjen û profesyonel tîne ziman.
Her wiha, dibe cihekî kombûna hunermendan ku gelek muzîkjen, derhêner û hunermendên herêmê di bin banê vê saziyê de berheman diafirînin.
Kurdên Rojavayê Kurdistanê, vê hunergehê wekî arşîvkirina folklorê bi nav dikin û dibêjin ku ew awaz û çîrokên Kurdî yên kevin bi rêya fîlm û projeyên wekî "Pargîn" diparêze.
Berhemên wan ên herî naskirî mîna stranên "Şervano", "Jin Jiyan Azadî", "Êmo", "Qamişlo li Ber Derî" û gelek stranên herêmî yên folklorî ne ku li ser platformên dîjîtal mîna YouTube û Spotify têne weşandin.
Hunergeha Welat, ji damezrandina xwe ve û heta niha zêdetirî 300 berhemên hunerî tomar kirine.
