Girtiyê bi navê Mesûd Hemo Reşo, ku di bûyera trajîk a li girtîgeha Kobanê de birîndar bûbû, li bajarê Helebê di nexweşxaneya ku lê dihate dermankirin de, di saetên dereng ên şevê de şehîd bû.
Bûyera ku di 12’ê Îlonê de li girtîgeha Kobanê rû dabû, ji ber derketina şewatekê pêk hatibû. Di dema rûdana bûyerê de 9 girtiyan yekser jiyana xwe ji dest dabû û 17 girtî jî birîndar bûbûn.
9 şehîdên pêşîn ên vê rûdanê, roja Şemiyê (14’ê Îlonê) li bajarê Kobanê bi tevlêbûneke girseyî û bi merasîmeke mezin hatibûn oxirkirin. Birîndarê dawî Mesûd Hemo Reşo jî tevî hemû hewldanên bijîşkî yên li Helebê nehate rizgarkirin.
