Li paytexta Koreya Başûr Seoulê, di civîneke çapemeniyê de Rafael Grossi, rave kir ku ajansê zêdebûneke bilez di xebitandina çend tesîsên girîng ên di navenda nukleerî ya Yongbyon de dîtiye.
Rafael Grossi da zanîn ku di nava tesîsên ku zêdebûna bilez di xebatên wê de heye, reaktora 5-megawatt, yekîneya ji nû ve hilberandinê, reaktora ava sivik û tesîsên din hene.
Grossi: Bernameya nukleerî ya Koreya Bakur bi dehan serikên şer dihewîne
Grossi destnîşan kir ku ev yek, berfirehbûneke eşkere di çalakiyên têkildarî hilberîna materyalên nukleerî de nîşan dide.
Her wiha Rêveberê Giştî yê Ajansa Enerjiya Atomî ya Navneteweyî tekez kir ku texmînên heyî nîşan didin ku bernameya nukleerî ya Koreya Bakur "bi dehan serikên şer" dihewîne û wiha eşkere kir:
"Xebatên avakirina tesîseke nû ku dişibe tesîsên heyî yên ku li Yongbyonê tên dîtin û tê bawerkirin ku ew jî ji bo dewlemendkirina Uranyûmê ye".
Grossi: Pêşxistina çekên nukleerî ewlehiyeke zêdetir çênake
Rafael Grossi da xuyakirin ku ji ber ku ajans ji sala 2009'an û vir ve negihîştiye Koreya Bakur, hîn jî nikare nirxandina pîvana rastîn a hilberînê bizanibe û wiha lê zêde kir:
“Agahiyên heyî jî, hemû xwe dispêrin wêneyên satelîtê û analîzên derve."
Di dawiyê de, Rêveberê Giştî yê Ajansa Navneteweyî ya Enerjiya Atomî Rafael Grossi hişyarî da ku berdewamiya vê rêyê dikare bandorên berfirehtir li ser ewlehiya navneteweyî bike.
Rafael Grossi da zanîn ku pêşxistina çekên nukleerî "ji bo ti welatekî ewlehiyeke zêdetir peyda nake", lê dibe ku deriyê pêşbirkeke çekên nukleerî li herêmê veke.
