Di civîna şeva borî ya Encumena Wezîran a Îraqê de, di navbera Serokwezîrê Îraqê û wezîrê Dadê yê Îraqê Xalid Şiwanî de ku wezîrekî Kurd e, der barê dahat û şayisteyên darayî yên Herêma Kurdistanê de rageşî û nîqaşeke germ derket.
Serokwezîrê Îraqê daxwaza zelalmendiyê kiriye û ragihandiye ku "pêwîst e hemû dahatên Başûrê Kurdistanê bi awayekî zelal û şefaf vegerin Bexdayê.
Hûrgiliyên nîqaşê bi vî awayî ne:
Ev nîqaşa tund di civînê de li ser mijara budce, mûçe û mafên darayî yên Başûrê Kurdistanê derketiye.
Wezîrê Dadê Xalid Şiwanî daxwaza şandina mûçeyên fermandarên Kurdistanê kiriye û behsa rewşa zeviyên gazê yên Kormorê kiriye.
Di dema nîqaşê de Wezîrê Darayî ya Îraqê (Falih Sarî) nerazîbûn nîşan daye û gotiye: "Me di sê salan de 22 trilyon dînar dane Herêma Kurdistanê û we ji para xwe zêdetir biriye."
Elî Zeydî: Ji her cure nermbûn û jihevtêgihîştinê re amade me
Serokwezîr Elî Zeydî jî daxwaza zelalmendiyê di dahatên Kurdistanê de kiriye û gotiye ku divê hemû dahat radestî Bexdayê bibin.
Lê belê, wî tekez kiriye ku ew ji bo çareserkirina pirsgirêkan hatiye, ne ji bo afirandina qeyranên nû .
Ti biryar li ser şandina mûçeyên Başûrê Kurdistanê nehatiye dayîn
Her çiqas alozî çêbibe jî, serokwezîrê Îraqê daye zanîn ku pirsgirêka wî bi Başûrê Kurdistanê re tune ye û ev peyam daye:
“Em hemû di nav Îraqê de yek can in.
Ez hatime da ku pirsgirêkan çareser bikim, ne ku pirsgirêkên nû derxim.
