Komeleya Rojnamevanan a Dicle Firatê (DFG) rapora binpêkirinên mafên rojnamevanan a Gulana 2025’an li Bakurê Kurdistan û Tirkiye belav kir.
Komeleyê da zanîn ku di mehekê de, di 43 dosyayên dozê de 78 rojnamevan hatin darizandin û 4 rojnamevan hatin cezakirin. Dîsa, li dijî 10 rojnamevanan lêpirsîn hatin vekirin û lêpirsînên 3 rojnamevanan jî veguherî dozên dadgehê.
Di daxuyaniya komeleyê de hat gotin ku niha 31 rojnamevan di girtîgehê de ne.
DFG destnîşan kir ku li kêlek girtin, darizandin û fişara li ser rojnamevanan, 3 malper hatin girtin, 12 nûçe hatin astengkirin û 465 naverokên medyayê jî hatin astengkirin.
Hin rojnamevanan li Bakurê Kurdistanê û Tirkiye derbarê rojnamevanên ku di dem û cihên cuda de hatine kuştin Nazim Daştan, Cîhan Bîlgîn, Gulîstan Tara û Hêro Behadîn, post belav kiribûn. Dadgeha Tirkiye der heqê wan de jî lêpirsîn vekir. Komeleyê ev kiryar rexne kir.
Di dawî de teqez kir ku dê rojnamegeriyê biparêzin û heta ku hemû rojnamevanên girtî serbest bên berdan, ew ê rastiyê binivîsînin.
Ebîr Muhemed
