Di konferansê de li gel ezmûnên cîhanê pêvajoya çareseriyê dê were nîqaşkirin.
Navên kesên ku dê beşdarî "Konferansa Aştî û Civaka Demokratîk a Navneteweyî" a ku dê li Stenbolê 2 rojan bidome, diyar bûn.
Gelek akademîsyen, siyasetmedar û pisporên ji Herêma Kurdistanê, Welatê Baskê, Îrlanda, Afrîkaya Başûr, Qazaxistan û Belçîkayê jî dê beşdarî konferansê bibin û gotaran pêşkêş bikin.
Konferans dê li Salona Konferansê ya Cem Karaca ya Stenbolê bê lidarxistin û axaftina vekirinê dê ji aliyê Hevseroka Giştî ya DEM Partiyê Tulay Hatîmogullari û Veysî Aktaşê ku demekê li Girava Îmraliyê girtî bû, were kirin.
Îlham Ehmed dê di konferansê de biaxive
Hevseroka Daîreya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyê Îlham Ehmed jî dê îro bi rêya zoomê tevlî konferansê bibe û beşdarî axaftina vekirinê bibe.
Tê payîn ku Îlham Ehmed behsa pêşketinên dawî yên li Sûriyê û Rojavayê Kurdistanê bike.
