Di demekê de ku li Başûrê Kurdistanê nîqaşên li ser nebûna şefafiyeta darayî germ in, Wezareta Darayî qebareya dahata bacê ya heft salên borî eşkere kir.
Dahata 7 salan nêzîkî 5.5 trilyon dînar e
Li gorî daneyên Wezareta Darayî, qebareya dahata ku ji destpêka sala 2019’an heta dawiya sala 2025’an ji bac û milkên mîrî hatiye komkirin, gihîştiye 5 trilyon û 415 milyar û 30 milyon dînarî.
Wezaretê destnîşan kir ku ji bo zêdekirina vê dahatê û rêkxistina pîşesaziya bacê, çend pêngavên girîng hatine avêtin.
Di nav van gavan de:
Sîstematîkkirina karûbaran bi hevkariya Saziya Teknolojiyaya Zanyariyan (IT)
Betalkirina efûkirinên bacê yên neyasayî û lêkolînkirina li ser deyndarên mezin hene. Rênîşandanên nû ji bo komkirina baca hawirdekirin û hinardekirinê li xalên sînorî hatine bicîhkirin.
Di daxuyaniyê de hat xuyakirin ku rêjeya herî zêde ya dahata bac û milkên mîrî li parêzgeha Hewlêrê hatiye komkirin. Li aliyekî jî çavdêrên aborî didin xuyakirin ku li Başûrê Kurdistanê pirsgirêkeke kûr a şefafiyetê heye.
Hinek pisporên aborî dibêjin ku dahata rasteqîn a herêmê ji vê mîqdarî bi gelekî zêdetir e.
