Artêşa Sûriyê li seranserê Sûriyê û li ser sînorê Îraqê rewşa hişyariya leşkerî ya herî bilind ragihand.
Ev tevgera leşkerî piştî ku Heşid Şebî li aliyê Îraqê hêzên zêde û alavên leşkerî li ser sînor bi cih kirin, dest pê kir.
Li ser xeta sînorî liv û tevgereke mezin a leşkerî û firîna balafirên şer ên nenas tê dîtin.
Li gorî agahiyên ku ji çavkaniyên ragihandinê û leşkerî hatine girtin, Artêşa Sûriyê bêyî ku hûrgiliyên sedemên wê yên tam eşkere bike, biryara bilindkirina asta amadebaşiya leşkerî da û yekîneyên xwe birin aliyê sînorê Iraqê.
Wezareta Parastinê ya Sûriyê ferman da ku hemû endam û yekîneyên wê bi lezgînî beşdarî baregeh û yekîneyên xwe yên leşkerî bibin.
Tevgera leşkerî ya Sûriyê rasterast piştî çavdêrîkirina tevgerên Heşid Şebî û komkirina alavên mezin ên leşkerî li ser sînorê Sûriye û Iraqê dest pê kir.
Tevî gihandina hêzên her du aliyan ji bo ser xeta sînorî, balafirên şer ên nenas li ser herêmê dest bi firîn û çavdêriyê kirin.
Çavkaniyên leşkerî ji Têlevîzyona Sûriyê re ragihandin ku Artêşê asta hişyariyê gihandiye lûtkeyê û di nava amadebaşiya herî bilind de ye.
Bilindbûna ji nişkan ve ya asta amadebaşiya leşkerî û komkirina hêzan li ser sînorê Sûriye û Iraqê nîşan dide ku rewşa ewlehiyê ya li herêmên sînorî hîn jî nazik e.
Çavdêrîkirina van liv û tevgeran ji bo pêşîgirtina li her tevlîheviyeke ewlehiyê tê.
