Rêya di navbera navçeya Miks û Wanê de, ji ber berfa zêde û şert û mercên ne guncaw, ev 7 meh in girtiye.
Xelkên herême destnîşan dikin ku ev pirsgirêk bi salan nehatiye çareserkirin û saziyên dewletê ji bo vê pirsgirêkê gav navêjin.
Ev rewş ji aliyê rayedaran ve jî bi hinceta “berf û metirsiya aşûtê” tê rewakirin, û welatiyan mexdûr dike.
Ji ber ku rêya sereke ya Miksê ev 7 meh in nayê vekirin, têkiliya rasterast a navçeyê ya bi Wanê re qut bûye.
Welatiyên ku nexweş in an jî ji bo pêdiviyên xwe yên lezgîn divê biçin navenda Wanê neçar dimînin ku rêyeke dirêj û zehmet bi kar bînin.
Bi taybetî ev rê 6 saetan dom dike, ji bo nexweşan hem dibe êşkence hem jî jiyana welatiyan dixe di metirsiyê de.
Welatî ji Miksê derdikevin, diçin navçeya Xîzan a Bedlîsê û ji Bedlîsê berê xwe didin Wanê.
Ev rêya alternatîf a ku bi qasî 250 kîlometreyan dirêj e, hem ji aliyê aborî hem jî ji aliyê dem û ewlehiya jiyanê ve mexdûriyeteke mezin diafirîne.
Welatiyên ku di nava qeyrana aborî de dijîn, ji ber vê rêya dirêj xercên zêde yên sotemenî û rêwîtiyê jî didin.
"Hewldanên rayedaran metirsiya welatiyan a 7 mehan ji holê ranake"
Rayedarên Karên Rêyên Bejahiyê, piştî 7 mehan nû dest bi xebatên paqijkirina berfê kirine.
Tîmên ku ji ber metirsiya aşûtê tenê bi şev û bi projektoran dixebitin, hewl didin ku berfa ku stûriya wê gihîştiye 4-6 metreyan paqij bikin.
Lê belê ev destwerdana derengmayî, metirsiya welatiyan a 7 mehan ji holê ranake.
Welatiyên ku ji bo vê rewşê gazincan dikin, bi derfetên xwe pirsgirêkên xwe çareser dikin.
